حازم إيهاب: أنا ضد إن موضوع الأعلى مشاهدة ياخد شكل خناقة!
علق الفنان حازم إيهاب على جدل المسلسلات الأعلى مشاهدة والذي تصدر التريند في الأيام السابقة بين صناع مسلسلات "الست موناليزا" و"وننسى اللي كان" و"إفراج" و"علي كلاي".
قال "إيهاب" خلال لقائه مع "ET بالعربي": "أنا موقفي لازم هيبقى سلمي ومش هعرف أخد صف حد، لإن أحمد العوضي ده أخويا الكبير، بموت فيه وبحبه وربنا يعلم غلاوته عندي عاملة إزاي".
أردف: "عمرو سعد اشتغلنا سوا في (SNL بالعربي) وكنا بنحب بعض، وأحمد سعد أخوه أنا بموت فيه من أيام ما كنا مع بعض في الجيم في التجمع و(الست موناليزا) ده مسلسلي فهنا غصب عني هقول شغلي أحسن شغل".
تابع: "في وجهة نظري إني شايف حلو أصلًا إن احنا التلاتة نقول إننا رقم 1 ده شيء حلو، مظنش إن دي حاجة تضايق حد.. فكرة مين الأول ومين التاني والتالت، رغم إن في حاجات 15 وحاجات 30، أنا في اللعبة دي شايف إني لما بفتح اتفرج على شاهد خلاص مكتوب رقم 1 فروحت مصورها ومنزلها وقولت مبروك أنا رقم 1 أظن إنه حقي".
أكمل: "أنا كواحد من كاست المسلسل ببقى فخور إني رقم 1، حد تاني حس إنه رقم 1 تمام حقك تقول وكلنا نبقى مبسوطين.. المهم إن المشاهد في الآخر شايف حاجة حلوة وتنوع في المسلسلات مش خارج من الموسم بيقول كان في كذا وكذا".
أشار: "أنا ضد إن الموضوع ياخد شكل خناقة خصوصًا إن كل الناس دي في يوم من الأيام هتشتغل مع بعض.. لو أنا في يوم من الأيام عملت مسلسل بطولتي ولقيت نفسي رقم 1 هصورها وأنزلها، لقيت مصطفى غريب نزل بعدها إنه رقم 1 هبعتله أقوله مبروك.. المهم إن أنا وأنت كويسين ومش عايز حاجة تاني من الدنيا".