آية شعيب: مفيش حاجة اسمها أب بيخطف ولاده!

انتقدت المذيعة آية شعيب أسلوب طرح قضية رؤية الأطفال في مسلسلي "كان ياما كان" و"أب ولكن"، مؤكدة إلى ضرورة استعانة صناع الدراما بمراجع قانوني عند مناقشة مثل هذه القضايا.

نشرت "شعيب" مقطع فيديو عبر حسابها الرسمي على موقع التواصل الاجتماعي وتبادل الصور والفيديوهات "إنستجرام"، وقالت: "هي إيه حكاية المسلسلات اللي بيتقال فيها الأب خاطف ابنه أو بنته؟

هو أصلًا القانون مفيهوش التهمة دي ولا المصطلح ده".

تابعت: "مكنتش أم غلبت ولا لفت السبع دوخات عشان ترجع عيالها المخطوفين من أبوهم، ولا في حد هيدور للأم على العيال أو هيساعدها توصلهم وترجعهم إلا لو عرفت هي العنوان بنفسها، ودي حاجة بيحصل فيها تلاعب ياما،

ممكن عادي الأب يغير مكان الطفل كل شوية وكل مرة هترجعي تعملي الإجراءات التاني من الأول عشان نوصل لمرحلة التنفيذ وفي الآخر حتى لو زعق لها نبي ونفذت قرار النيابة ورجعتهم وقرر الأب ياخدهم تاني هنلف نفس اللفة تاني، اللي فيها محضر وقرار نائب عام.. ده بجد مش ببالغ ولا بأفور".

أشارت: "القانون في صف الست أيوة بس جدعة نفذي بقى..

لما الكُتاب يقعوا في غلطة زي دي في مسلسلين ورا بعض في نفس الموسم، (كان ياما كان) و(أب ولكن) فآلاف الأمهات اللي مشافوش عيالهم ولا يعرفوا عنهم حاجة هيحسوا بإيه؟ حطوا نفسكم مكانهم، ودول مش أقلية دول آلاف، نصهم معهومش فلوس يوكلوا محامي وبيلفوا يعملوا الإجراءات دي لوحدهم وأنا شوفت الكلام ده بعيني".

أضافت: "عايزين تعملوا مسلسلات تتكلم عن حق الأب في ولاده والظلم اللي بيتعرض له أحيانًا صح جدًا وقضية مجتمعية مهمة جدًا لازم نتناقش فيها بصوت عالي، واه في ستات مفترية وظلمة وفي الآخر العيال هي اللي بتتهرس في النص، لكن واحنا بنعمل الفن الهادف الجميل ده معلش ناخد بالنا من تفاصيل مهمة وكبيرة زي دي عشان الموضوع مش ناقص شحن أساسًا.. الحرمان من الأطفال دي قضية كبيرة اوي، المتضررين فيها رجالة وستات اه بس الستات أكبر بكتير وده الواقع اللي احنا عايشينه".

أردفت: "واه وهي مش متجوزة الولاد في حضانتها بس بيتاخدوا منها وبتتحرم منهم عادي عشان مفيش حاجة في القانون اسمها أب بيخطف ولاده.. كصناع دراما لازم يكون عندنا مراجع قانوني".