أبو: أغنية "3 دقات" نقطة تحول في حياتي
قال الفنان أبو إنه بدأ سنة 2026 بمنتهى الهدوء وتحضير النية الطيبة للعام الجديد.
أوضح أبو في برنامج "لمن يهمه الفن" على نغم إف إم مع الإعلامية أميرة نور: "بطبعي بحب النهايات والبدايات لكل عام جديد، وفلسفتي في الحياة قول يا باسط تلقاها هاصت!".
نرشح لك: تفاصيل حفل خالد سليم في كاليفورنيا
استكمل: "حب فكرة دمج الأغاني وده اللى عملناه في أغنية "أهواك" وأغنية "ييجي الليل"، وبحب أغير في الحدوتة، والأغنيتين ليهم قصص ومواقف حقيقية حصلت معايا"
أردف: "أغنية "3 دقات" عملت لها اللحن كله الأول، وبعدين كتبت أول كوبليه، ولما قابلت تامر حبيب خلصناها في قعدة وطبعا كانت نقطة تحول في حياتي".
ذكر: "قاعدة الكرفان من وجهة نظري حاجة حزينة جدا، وبشفق على كل صحابي النجوم اللي بيقعدوا فترات طويلة في الكرفان عشان يطلعوا بمشهدين أو تلاتة، بحسها حاجة مرهقة جدا.. لو همثل أحب أقدم الأدوار السيكوباتية جدا، ونفسي أجرب نفسي في دور زي اللي في فيلم "الجوكر" كده، وحابب أعمل حاجة فيها تمثيل بجد، والحلم اللي نفسي أعمله هو مسرحية موسيقية، ويا سلام لو ليها علاقة بمصر".
اختتم: "هعمل دويتو قريب هينزل في الصيف، لأني بحب الدويتوهات جدا، وأسرع أغنية عملتها خدت مني ٤٥ دقيقة وكان اسمها "الناس ما بترحمش"، كلام ولحن نزلوا مع بعض، كمان عندي أغنية مشهور بيها في الوسط اسمها "شربات" من كلماتي وألحاني، دي أنا وزعتها تقريبا ١١ مرة وهتنزل إن شاء الله بعد رمضان.. لو هقول حاجة محدش يعرفها عني، أنا ما بعرفش أعمل شلة، بس عندي أصدقاء فرديين، وكمان بحب العزلة جدا".