كواليس أزمة يوسف شاهين وكمال الطويل بسبب "علي صوتك"

كشف المنتج جابي خوري عن تفاصيل خلاف خاله، المخرج الراحل يوسف شاهين، مع الملحن كمال الطويل بسبب أغنية "علي صوتك" لمحمد منير، التي عُرضت في فيلم "المصير"، مشيرًا إلى أن كلاً منهما كان مُصرًّا على رأيه حتى احتكما إلى العقد الذي بينهما.

قال "خوري" خلال حواره مع الإعلامية منى الشاذلي في حلقة مساء الخميس من برنامج "معكم" المذاع عبر شاشة "ON": "يوسف شاهين كلمني قالي: أنا بقالي 3 شهور ما بنامش، لأني عاوز أرقص بعدها سكوت ثم أرقص، لكن دلوقت موجود في النص بينهم ترا رام، وطلب مني أكلم كمال الطويل، وأقوله الكلام ده مينفعش".

أضاف: "أنا قُلت لـ(شاهين) أنا هكلم كمال أقوله ده مينفعش؟ أنا مين! قالي كلمه وحطه على الاسبيكر ولما يرد، هقولك تقوله إيه، هو وكمال مش عاوزين يكلموا بعض وحطوني في النص، واتخاصموا بسبب ده".

أشار: "أنا كلمت كمال الطويل، قالي: لو لمست الموسيقى أنت وخالك هحبسكم، وأنا هعمل محضر فيكم.. وقت المكالمة يوسف شاهين قالي قوله كمان في (بيس جيتار) في أغنية تانية لازم يبقى (ديسكو)، ولما قولت له، قالي: بتقول ايه!! كمال طويل يعمل ديسكو؟! ده، أنا هبهدلكم".

اختتم: "قلت لكمال الطويل العقد اللي مضيته بيقول لو في خلاف على الموسيقى في الفيلم رأي المخرج اللي يمشي فيما يخص عرض الأغنية في الفيلم.. حضرتك في أي حاجة إذاعة أو كاسيت حطها زي ما تحب.. والحكاية خلصت كده، واتحطت في الفيلم زي ما الأستاذ يوسف شاهين عاوز".