أخطأت بحسن نية.. أول رد من إمام عاشور على أزمته مع الأهلي
علق إمام عاشور، لاعب النادي الأهلي على أزمته بسبب تخلفه عن السفر مع بعثة الفريق إلى تنزانيا لمواجهة يانج أفريكانز في دوري أبطال أفريقيا غدا السبت.
نشر "عاشور" عبر خاصية القصص القصيرة على حسابه على موقع تبادل الصور والفيديوهات إنستجرام، وكتب: "للأسف كلام كتير مغلوط وغير صحيح بيتردد بخصوص اللي حصل. وأنا متقبل أي قرار ياخده النادي. وواثق أنه المسئولين في الأهلي هيتفهموا موقفي كويس".
تابع: "أنا فعلا عندي دور برد جامد ودرجة حرارتي عالية وتقلبات في المعدة بشكل غير طبيعي. وباخد مضادات حيوية. وللأسف كل أسرتي بتعاني من نفس الأعراض.. وأنا بلغت الدكتور أحمد جاب الله بظروفي الصحية وعدم قدرتي على السفر. وده إجراء غير كافي في مثل هذه الأمور. لكن أخطأت بحسن نية وكان المفروض أتواصل مع الكابتن وليد صلاح الدين علشان يبلغ المدير الفني وتتعمل الإجراءات الطبية المتبعة عند التخلف عن السفر".
استكمل: "الموضوع اتقفل خلاص. وتواصلت امبارح بالليل مع الكابتن وليد صلاح الدين. وأنا تحت أمر النادي. وجمهور الأهلي سندي وضهري بعد ربنا سبحانه وتعالى. وبعتذر للنادي والجهاز الفني وزمايلي وقبلهم جمهور الأهلي. أنا فخور باللعب في أكبر نادي في أفريقيا. وعلاقتي بجماهيره العظيمة لا تقبل القسمة على اتنين.. وأرجو من الجميع إغلاق هذا الموضوع".
اختتم: "والناس اللي بتقول إن إمام عايز يلوي دراع النادي بقولهم حسبي الله ونعم الوكيل.. محدش يقدر يلوي دراع الأهلي. ولا يمكن أفكر بالطريقة دي أبدا.. وأنا اتشرفت بارتداء الفانلة الحمراء وبقالي ٣ سنين في النادي. والحمد لله عمري ما قصرت لا في حق النادي ولا جماهيره. وده حقهم عليا. ووجودي في الأهلي نادي القرن وفي ضهري جمهور الأهلي يعوضني عن كل حاجة.. عندنا ماتش بكره مهم. يا رب كل التوفيق لزمايلي والجهاز الفني ونحقق الفوز اللي يسعد كل الأهلاوية".
يذكر أن الأهلي قد وقع عقوبة مالية قدرها مليون ونصف جنيه على إمام عاشور مع إيقافه لمدة أسبوعين والتدريب منفردا.
