أول رد من محمد عبد المنصف على أزمة طلاقه من زوجة ثانية

رد محمد عبد المنصف، حارس مرمى الزمالك السابق، على الأزمة التي أثيرت مؤخرا، بشأن إعلان الفنانة إيمان الزيدي، انفصالها عنه بعد زواج دام 7 سنوات.. والذي ترتب عليه إثارة حالة كبيرة من الجدل والتعاطف مع زوجته الأولى الفنانة لقاء الخميسي.

"عبد المنصف" التزم الصمت طوال الفترة السابقة، إلا أنه رد للمرة الأولى من خلال لقائه عبر برنامج "اللعيب" المذاع عبر شاشة mbc مصر وقال الآتي: "طالما ارتضيت تبقى شخصية عامي في أي مجال فطبيعي الناس تتكلم عليك أو يبقى في نقد أو مدح، الحتة اللي مش طبيعية إني من ساعة ما بدأت حياتي مبتكلمش كتير عن أسرتي والحاجات العائلية دايما بتكلم على شغلي، فالموقف ده مالوش علاقة بشغلي، له علاقة بعيلتي وحاجات أسرية".

تابع: "ممكن الناس تتكلم بس في الآخر الحاجات دي بتبقى مع العيلة مقفولة، بحترم كل العيلة ومشوفتش حاجة كتير من الحاجات اللي فاتت، آه سمعت بس كنت مهتم بشغلي، عارف الخطأ في ايه وعارف إن تقديري مكنش 100%.. لكن في الآخر الموضوع حاجة عائلية.. احنا بنقعد على الترابيزة كأسرة بنصارح بعض بالحاجات، فانا مش شايف إن الموضوع كان ممكن يكبر زي ما حصل.. موضوع عادي، كان حاجات بتتقال إني خاين بقى وكلام فارغ وكلام مكنش يصح، حسيت ان الناس بتتكلم وخلاص مش فاهمة الموضوع".

أضاف: "كل حد بيقول حاجة لازم يبص لنفسه الأول، مكنتش حابب إن أي حد يتكلم في الموضوع ده وعيلتي فهمت الموضوع، هي حاجة طبيعية ممكن أي حد يعملها عادي، وتفهمت إن بالنسبالي الأهم إزاي أحافظ على الأسرة والعيلة، الحمد لله الأمور عدت بخير وأتمنى الناس تنسى، انا بخاف من ربنا.. ثم البني آدم هو شخص زيي ممكن أتكلم معاه واصارحه بحاجات، الحمد لله الأمور تمام ومستقرة".

كانت الفنانة لقاء الخميسي، قد أنهت أزمتها الأخيرة مع زوجها محمد عبد المنصف، حارس مرمى نادي الزمالك السابق، وذلك بعد إعلان الفنانة إيمان الزيدي انفصالها عنه بعد زواج دام لمدة 7 سنوات، ونشرت عبر حسابها الرسمي على موقع التواصل الاجتماعي وتبادل الصور والفيديوهات "إنستجرام" مجموعة صور برفقة زوجها محمد عبد المنصف في إعلان منها لانتهاء أزمتها معه، موجهة نصيحة لكل الزوجات وربات البيوت.

كتبت: "الدنيا بتختبرنا دائمًا وأبدًا، أيام بتسعدنا وأيام بتبعدنا وتزعلنا وتجرحنا، وبنتوه مع نفسنا! الحكمة بتظهر من قلب الحزن، وبنقعد نفكر إيه الصح وايه الغلط؟ وهل اللي عدينا بيه شر ولا خير؟".

تابعت: "مع الوقت، ولما النفس تهدى والعقل يفكر والقلب يدق، بنكتشف إن كلنا بنغلط وبنتوه شوية في وسط الزحمة.. في ناس بتغلط وتكمل في الغلط، وفي ناس بتغلط وبترجع لحكمتها وبتندم وتصحح الخطأ.. خطائين وخير الخطائين التوابين".

أكملت: "مفيش حد ما بيغلطش، بس القوي الحقيقي بيعترف بالغلط وبيرجع لصوابه. ربنا فتحلنا باب المغفرة والسماح".

أضافت: "شكرًا من قلبي لكل إنسان دعمني ووقف جنبي وطبطب عليا، وشكرًا لكل أصدقائي المقربين اللي وفقوا جنبي وكل من دعمني من أصدقاء السوشيال ميديا اللي نوروا حياتي بالمحبة وطبطب على قلبي ودعالي دعوة حلوة".

أشارت: "آخر حاجة هقولها، أسهل حاجة في الدنيا هدم البيوت العمرانة وأقوى حاجة في الدنيا إننا نحافظ على حياتنا ونحارب على بيوتنا وأولادنا بالحب والسلام.. كلنا بنغلط وبنندم وبنرجع لصوابنا، ونرجع ببداية جديدة مليانة شغف وحب وسلام وراحة بال".

اختتمت كلامها بنصيحة للسيدات موضحة: "لكل ست وربة منزل حافظي على بيتك وعيلتك بكل قواكي واوعي تدي الفرصة لأي انسان إنه يهدم بيت العيلة.. بحبكم من كل قلبي أصدقائي وعيلتي الكبيرة".