رسالة هيدي كرم لـ البلوجرز: العلاقات العاطفية مش حرب!
تحدثت الفنانة هيدي كرم عن المؤثرين على مواقع التواصل الاجتماعي الذين يقومون بنشر محتوى عن العلاقات العاطفية وهم غير متخصصين في ذلك الأمر، مشيرة إلى أن ما يفعلونه يؤدي إلى تخريب العلاقات وليس إصلاحها كما يظنون.
نشرت "كرم" مقطع فيديو عبر حسابها الرسمي على موقع التواصل الاجتماعي وتبادل الصور والفيديوهات "إنستجرام" وكتبت: "بلاش نخلي أي حد مش فاهم أي حاجة يلعب في دماغنا، لازم احنا نفكر وندور ونقرأ ونكوّن رأي ووجهة نظر خاصة بينا، الثقافة السمعية دي هتودينا وراء الشمس".
قالت خلال الفيديو: "بقالي مدة كل ما بفتح الإنستجرام بيطلعلي بلوجرز ستات أو رجالة مصريين أو أجانب أيًا كانت الجنسية حبايبي معندهومش أي خبرة ولا مرجعية علمية، لا دارسين ولا قاريين يادوب عدوا على سطرين في كتابين وقرروا أنهم يعملوا فيديوهات عن العلاقات بين الراجل والست، وإزاي حضرتك تقدري تقرأي الريد فلاجز والجرين فلاجز والبلاك فلاجز من أول لحظة، وتختبرها إزاي عشان تعرف نواياها ومخبية إيه وكل واحد قاعد بيفتي في كيفية انتقاء واختيار الشريك المناسب، على أساس إن حضرتك خبير في العلاقات العاطفية.. حضرتك متعرفش أي حاجة".
تابعت: "النتيجة النهائية أننا كلنا كستات ورجالة بنفتح السوشيال ميديا نتفرج على الفيديوهات دي فبالتالي لما الراجل يتعرف على ست وكذك الست لما تتعرف على شاب، بقينا داخلين مش نتعرف على بعض، احنا داخلين نوقع بعض وحرب تكتيكية مخابراتية باردة ما بين قوتين عظمتين مين هتنتصر في الآخر وهتنسف التانية".
أضافت: "حالة التوجس والتحفز والتحفظ اللي بنخش بيها العلاقة لأننا بنفترض سوء الظن قبل ما تبتدي وأن الشخص ده هيطلع وحش والست هتطلع استغلالية وكدابة ومنافقة.. طب احنا بنخش علاقات ليه؟ ما كل واحد يقعد في بيته على كنبته وميحاولش يتعرف على حد لأننا بقينا عارفين أننا هنطلع من العلاقة دي متعورين".
أكملت: "وبعدين يا خبير لازم تبقى عارف وأنت بتفتي أن مفيش حاجة مطلقة، كل ثنائي بيتعرفوا على بعض ليهم ظروف خاصة ليها علاقة بالمرحلة العمرية اللي بيتعرفوا فيها، والخلفية الثقافية اللي هما جايين منها، والتجارب اللي عدوا بيها قبل كده، وظروفهم المادية وحاجات كتير جدًا".
أشارت: "فالخبراء الجمال اللي مغرقين الدنيا على السوشيال ميديا واللي لعبوا في دماغ الناس وبوظوا عقلهم، لازم تحط في دماغك بعض النقاط المهمة اللي ممكن تغير من فتواك خالص وترحمنا منها".
تابعت: "لو هنبدأ نخش بسبب التلوث الفكري اللي جالنا من البلوجرز اللي لا يفقهوا شيء ولا يعرفوا ولا يفهموا شيء وقرروا يفتوا علينا عشان يعملوا محتوى يجيب مشاهدات، وكل واحد يحط إحباطاته في المحتوى، لو أدينا عقولنا للناس دي اللي بنفكر منهم ألف مرة لو بس فكرنا، هنضيع وعلافتنا هتبوظ ومش هنعرف نعمل علاقات".
اختتمت كلامها: "أرجوكم نروق ونهدا على بعض هي مش حرب، ملناش غير بعض في الآخر، الراجل ملوش غير الست، والست ملهاش غير الراجل فلازم نتصالح، الخناقة اللي دايرة على السوشيال ميديا دي مش داخلة دماغي ومش عجباني فلازم نرفع رايات السلام البيضاء بيننا وبين الجنس الآخر ونتصالح لأن الحياة في الآخر راجل وست".