بسبب تطبيقات التقسيط.. محمد علي خير يحذر المواطنين: عيشوا على قدكم!

وجه الإعلامي محمد علي خير رسالة للشعب المصري، ناصحًا إياهم بالاعتدال في الشراء واستخدام تطبيقات التقسيط الاستهلاكي، وذلك بسبب ارتفاع ديون الأسر المصرية حسب تقارير هذا العام.

قال "خير" خلال برنامجه "المصري أفندي" المذاع عبر قناة "الشمس": "ديون الأسر المصرية ارتفعت إلى 7 مليار دولار هذا العام، يعني أخدوا قروض أزيد من السنة اللي فاتت بـ 350 مليار جنيه".

تابع: "في قروض دلوقتي بقت استهلاكية يعني تاخد فاتورة مثلًا من هايبر ماركت كبير وتبعتها للتطبيقات دي يبعتولك فلوس.. بس عليك أقساط، أسبوعين وهيجيلك أول قسط.. خلي بالك أنت راجل محترم وبخاف عليك، مد لحافك على قد رجليك وعيش على قدك

كل دول العالم بتوجه نصايح لشعوبها أنهم يعيشوا على قدهم".

أضاف: "تحويلات المصريين في الخارج زادت اوي، بسم الله ما شاء الله، عاملين لحد دلوقتي في أول 10 شهور 34 مليار دولار، البنك المركزي بيقول، وفي تقديرات أننا هنوصل من 42 مليار دولار إلى 45 كمان 5 سنين".

أشار: "مش عايز أتعامل مع المصريين العاملين في الخارج أنهم مجرد أرقام بيبعتولي فلوس، مش عايز أتعامل معاهم أنهم فرخة بتبيض دهب، أنا عايز أوطد علاقتي كدولة وحكومة بالمصريين العاملين في الخارج. أدعو حكومة بلدي إنها تدعو المصريين العاملين في الخارج إلى التقدم لشراء كل الشركات والبنوك والمصانع اللي الحكومة عرضاها للبيع".