"الرفق بالحيوان": مصر في أزمة.. الكلاب الضالة تخطى عددها 40 مليون كلب
كشف الدكتور شهاب الدين عبد الحميد، رئيس مجلس إدارة جمعية الرفق بالحيوان بالقاهرة، عن أعداد الكلاب الضالة في الشوارع، مشيرًا إلى أسباب تزايد أعدادها بهذا الشكل.
قال "عبد الحميد" خلال مداخلة هاتفية مع الإعلامي محمد علي خير في برنامج "المصري أفندي" المذاع عبر شاشة قناة "الشمس": "مصر في أزمة شديدة جدًا، وعشان نرجع بالتاريخ، قبل أحداث 25 يناير 2011 كان الموكل اللي بيقوم بعملية التنظيم هو وزارة الداخلية، جهاز الشرطة.. هو ده اللي كان بيحافظ على التوازن البيئي، هو مكنش بيلم الكلاب اللي في الشارع، هو كان بيشوف لو لقى كلب عامل مشاكل في المنطقة أو مريض بياخده، لكن باقي الكلاب مكنش بيقرب عندها، فده بنسميه نوع من أنواع الحفاظ على التوازن البيئي".
تابع: "بعد الفترة دي حصلت مشكلة كبيرة جدًا في كذا حاجة، كان أهمها أن محدش بيشيل القمامة من الشوارع، وتوقف الشغل نظرًا للأحداث اللي حصلت مع الداخلية وده أدى إلى زيادة أعداد الكلاب لأن محدش بيحافظ على التوازن البيئي، وصدر قرار وقتها بوقف استخدام الخرطوش اللي هما كانوا بيستخدموه في التخلص من ده، فالأحداث دي كلها لمدة 3 أو 4 سنين متواصلة أدت إلى أن الأعداد تزداد بشكل كبير، لما يبقى عندنا كلبة أنثى وتولد في السنة مرتين كل مرة بتدي من 8 لـ 10، فده معناه إن في نهاية السنة أدت من 16 لـ 20، نقول نصهم مات فيبقى فاضل معاها من 8 لـ 10، فتخيل حضرتك إن الكلبة الواحدة فقط في نهاية السنة بتبقى 11".
أضاف: "لا يقل عددهم عن 30 أو 40 مليون كلب ضال في الشوارع، عملنا دراسة وطلع التقدير إن الزيادة الموجودة تصل إلى 500%.. والدولة تنبهت وأصدرت قانون اللي هو 29 لسنة 2023 بالسيطرة على الكلاب المملوكة والضالة لأن في فرق بين الاتنين".
أشار: "في بعض العادات السيئة اللي أدت لزيادة الأعداد كمان أكتر من ضمنها الأكل العشوائي اللي ناس كتير بتعمله للأسف وده مش صح، الكلب أصبح قاعد قدام بيوتنا مستني أكله يجيله دليفري وهو اتعود فسلوكيات الكلاب اتغيرت، ومن هنا جت أن الكلاب لو شافت طفل في إيده كيس فيه شيبسي أو أي حاجة بيهجموا عليه لأنهم فاكرينه جايبلهم الأكل.. ممنوع تأكلوا كلاب الشوارع لأن ده من العادات الخطر على المجتمع.. في ناس بتأكلهم رجول فراخ ومخرجات مجازر ولحمة نية فأنت كده بتشرس الكلب وبتغير سلوكياته وعاداته".
أردف: "احنا مش هنموت كلاب الشوارع، وعشان كده استقرينا على فكرة أننا نعمل مأوى ليهم في جميع محافظات مصر مش القاهرة بس، وهنجمع الكلاب وهنحطهم في الملاجئ، وهتتم مجموعة من الإجراءات فهيكون في تعقيم وتحصين ومنع التزاوج بينها وبين بعضها وفي إجراء بيطرية علمية هتتعمل، احنا بدأنا في 10 محافظات مجهزين منهم القهرة وقنا وكل محافظة هتعلن عن الأماكن الموجودة فيها".