الصحة تكشف حقيقة فيروس الجهاز التنفسي المنتشر
كشف الدكتور حسام عبد الغفار، المتحدث الرسمي باسم وزارة الصحة، عن حقيقة الفيروس المنتشر في الفترة الحالية والذي يصيب الجهاز التنفسي، والذي سبب قلقًا لدى الكثيرين.
قال "عبد الغفار" خلال مداخلة هاتفية مع الإعلامي عمرو أديب في برنامج "الحكاية" المذاع عبر شاشة "mbc مصر": "لا توجد علاقة بين الفيروسات التي تصيب الجهاز التنفسي، وفيروس الحمى النزفية "ماربورغ" المنتشر في بعض الدول الأفريقية، وهذا الفيروس غير موجود عندنا في مصر".
تابع: "ده فيروس بينتقل عن طريق سوائل الجسم، ولا ينتقل عن طريق الهواء زي الفيروسات التنفسية، واحتمالية وجوده أو تعرض مصر له منخفضة جدًا بالأدلة العلمية، لأنه بينتقل من نوع من الخفافيش اسمها (خفافيش الفاكهة) اللي هي غير موجودة في مصر".
أكمل: "السفر من وإلى الدول اللي فيها إصابات قليل جدًا في حركة السفر، وهناك ترصد كامل للقادمين من هذه الدول في الحجر الصحي المصري، سواء في المطارات أو في منافذ أخرى، بالإضافة إلى أن انتقال العدوى بيحتاج محاوطة لصيقة وطويلة، غير الفيروسات التنفسية اللي بتنتقل عن طريق الهواء، والفيروس الواحد بيعدي 3 و4 و5 والكوفيد اللي كان بيوصل لحد 12".
أشار: "صحيح أن الأعراض بتبدأ بارتفاع في درجة الحرارة لكن بتنتهي بنزيف من كافة الأعضاء والوفاة، ومفيش عندنا أي نوع من العلاج لهذا الشكل ده".
أوضح: "احنا في فترة الشتاء ودخوله اللي هي فترة شهر 10 و11 و12، هي فترة انتشار الفيروسات التنفسية على مستوى العالم واللي من ضمنها مصر، زي الأنفلونزا والفيروس المخلوي وكوفيد".
أردف: "طب هل احنا عندنا زيادة في الإصابة بالفيروسات التنفسية الأيام دي؟ اه عندنا زيادة لكنها نفس الزيادة اللي كانت موجودة السنة اللي فاتت وقبلها، إيه المختلف السنة دي؟ المختلف أن الأنفلونزا وخاصةً (الأنفلونزا أ) هي الأعلى في معدلات الإصابة بنسبة 66%، وهي تفرق في التركيب الجيني للفيروس وشدة الإصابة، فهي أشد من (الأنفلونزا ب)".