حلمي عبد الباقي: مش هسيب حقي!
تحدث الفنان حلمي عبد الباقي عن أزمته مع نقابة المهن الموسيقية، وعن تسجيل صوتي تضمن عبارات مسيئة له، مشيرًا إلى أنه لن يترك حقه.
نشر "عبد الباقي" مقطع فيديو عبر حسابه الرسمي على موقع التواصل الاجتماعي "فيس بوك" قال فيه: "ترددت كتير أني أعمل الفيديو ده بس في الآخر أنا راجل تلقائي لما بحب أتكلم بتكلم، في البث المباشر اللي حصل في نقابة المهن الموسيقية واللي كل الناس قالت هو إيه ده؟ إيه كمية الزعيق والخناقات دي، ناس كتير لامتني وقالتلي أنت ليه متكلمتش؟".
تابع: "في ناس لما بتيجي بتتكلم مبتاخدش فرصة تمامًا لازم يقطعوا عليهم، أنا اتكلمت في النقطتين اللي اتوجهوا ليا بالتحديد، الإسكان ونادي المنصورة، وأنا لا كنت هنا ولا هنا ولا أعلم عنهم أي شيء، دي نقطة".
أكمل: "النقطة التانية، أنا بسأل الجمعية العمومية بكاملها، هل حلمي عبد الباقي في يوم قصر مع حد؟ هل أنتوا شايفينه أنه مكنش بيشتغل؟ من أيام الأستاذ هاني شاكر وأنا ماسك لجنة الخدمات، والناس أكيد مش ناسية أنا كنت بعمل إيه أيام كورونا، ولما كنت بنزل بدي الناس الجوابات عند بيوتها، وفي الآخر عملت بروتوكول مع جميع المستشفيات والمراكز اللي أنا معظمها تعاقدت معاها".
أضاف: "قولت يا جماعة عايزين نتعامل بالواتس اب عشان نشيل الحمل من على الناس، أنها تنزل من بيوتها ومواصلات وتعب والحمد لله الدنيا نجحت جدًا، فطبعًا كان شيء محمود أعتقد ومقصرتش مع حد أبدًا، سواء أعرفه أو معرفوش".
أشار: "أي حد مش أنا بس، أي حد بيعترض على أي حاجة يبقى متآمر وبيزايد.. 3 نقط سريعًا كده، لما صحيت من النوم ولقيت مكتوب على جروب المجلس، قرر النقيب العام إلغاء التعامل بالواتس آب أنا اعترضت وقولت لا مش هينفع، إزاي ننزل الناس من بيوتها ومواصلات رايح ومواصلات جاي! وغير التعب والإنسان اللي جاي تعبان عشان ياخد جواب من النقابة.. فاتُهمت أني بزايد".
أردف: "أنا بتكلم في مصلحة الناس.. تاني نقظة، موضوع التربية النوعية اللي اتكلمنا فيه وقولنا ده قانون دولة، اللي معاه تربية نوعية لازم ياخد الكارنيه، قالوا أيوة ما أنتوا عايزين تهدوها وهو عشان خاطر أحمد أبو المجد! قولت الله هو أحمد أبو المجد بس اللي عنده تربية نوعية؟ ما في جميع أنحاء مصر فيه تربية نوعية.. يبقى أنا برضه بزايد ومن الناس اللي عايزة تهد النقابة".
أوضح: "بمعنى أصح، أي اعتراض بيُعتبر مؤامرة وهدم للنقابة.. آخر حاجة بقولها، أنا بعد كل اللي عملته في نقابة المهن الموسيقية وخدمتي لكل الناس، وأنا سعيد بده أتفاجئ بتسجيل صوتي بتهان فيه وأُسب فيه بكلام صعب اوي أنه يتقال على حلمي عبد الباقي لأنك عارف أني جدع وأني راجل مش جبان، لما وقفت معاك ساعة الانتخابات ولفيت بيك مصر كلها، كان الفضل لربنا ثم أنا ثم ناس آخرين، إيه اللي يخليني أتغير ويحصل كده؟ الناس دخلت في ودانك أن حلمي بيعمل كده وبيخدم الناس عشان عايز يبقى نقيب!
تابع: "للأسف الشديد أنت سمعت وتعاملت معايا بعد كده على هذا المنطق.. أنا راجل محترم وليا أسرة محترمة وزوجة محترمة وأولاد محترمين، 2 إعلاميين وواحدة مهندسة ديكور وواحدة دكتورة، لما يسمعوا الكلام ده على أبوهم المحترم اللي رباهم أحسن تربية، هقول إيه! بس عايز أقول لكل الناس أنا مش هسيب حقي.. لو سيبت حقي يبقى أموت أحسن".