بعد أزمة تصريحاته في مهرجان وهران.. ياسر جلال: أنا أخطأت!
اعتذر الفنان والنائب ياسر جلال عن تصريحاته الأخيرة في مهرجان وهران بالجزائر، والتي تسببت في غضب فئة كبيرة من الجمهور.
قال "جلال" في فيديو نشره عبر حسابه الرسمي على موقع التواصل الاجتماعي وتبادل الصور والفيديوهات "إنستجرام": "من كام يوم قولت كلام في مهرجان وهران بالجزائر وأنا بتكرم إن والدي حكالي زمان أن بعد حرب 67 في إشاعة أن إسرائيل هتعمل إنزال في ميدان التحرير عشان تعمل أعمال تخريبية في وسط البلد، وقولت إن الجزائر بعتت قوات صاعقة عشان تحمي المواطنيين المصريين".
تابع: "والدي اللي حكالي الكلام ده وفي الفترة دي كان في شائعات كتير، فوارد أن والدي يكون اختلط عليه الأمر والموضوع مكنش دقيق بالنسبة له ومكنش صح".
أشار: "لكن لما شوفت امبارح على الفضائيات بعض السادة المحترمين المتخصصين قالوا إن المعلومة دي خاطئة فأنا بعتذر عن الكلام اللي قولته".
أكمل: "ربنا سبحانه وتعالى أعلم بنيتي وأنا كان قصدي إيه بالكلام ده، كان قصدي أننا نقرب من بعض، أنا فنان والفنان زي سفير لبلده فكان قصدي أقرب المشاعر والعلاقات بين مصر والجزائر".
أضاف: "أنا بعتذر للناس اللي أضايقت من التصريح ده، وفخور أن كل الناس غيورة على مصر وجيشها، وحقكم عليا أنا آسف. أنا قولت والدي اللي حكالي، لا قولت مسؤول ولا حاجة.. دي حاجة سمعتها من والدي وأنا صغير وحبيت أقولها في مناسبة يعني، بس واضح أني غلطت وأخطأت وأنا بعتذر.. حقكم عليا".