رد ياسر جلال على أزمة تصريحاته في مهرجان وهران
رد الفنان والنائب ياسر جلال على أزمة تصريحاته الأخيرة خلال تكريمه في مهرجان وهران السينمائي الدولي بالجزائر، موضحًا فخره واعتزازه بأنه في يومٍ من الأيام كان أحد أبناء القوات المسلحة المصرية.
نشر "جلال" مقطع فيديو عبر حسابه الرسمي على موقع التواصل الاجتماعي وتبادل الصور والفيديوهات "إنستجرام"، قال فيه: "في البداية أحب أقول كل التحية والتقدير والتعظيم والإجلال لقواتنا المسلحة المصرية الباسلة".
تابع: "أنا بفتخر وبتشرف أني كنت في يوم من الأيام واحد من أبنائها وأفرادها لما قمت بتأدية الخدمة العسكرية وحصلت على شهادة إتمام الخدمة قدوة حسنة، وبفتخر أني قدمت لبلدي عملين في منتهى الأهمية، عملين وطنيين، الاختيار الجزء التالت وفيلم يوم الكرامة، الفيلم الحربي العظيم".
تابع: "محدش يقدر يزايد على دور مصر ومساعدتها لأشقائها على مر التاريخ من المحيط إلى الخليج، بس أنا لقيت بعض التعليقات السلبية على الكلام اللي قولته في الجزائر أثناء تكريمي في مهرجان وهران السينمائي الدولي، قولت نصًا إن الجزائر بعد حرب 67 والدي حكالي أنها بعتت قوات صاعقة عشان تحمي المواطنين المصريين في ميدان التحرير عشان كان في إشاعة أن إسرائيل هتعمل إنزال وعمليات تخريبية في وسط البلد".
أكمل: "والدي كان دايمًا يحببنا في الوطن العربي وكلمة عروبة والدانا العربية، وبيحكيلنا عن الجزائر والسعودية وسوريا وكل أشقائنا العرب، على فكرة الأدوار معروفة، ودور مصر في خدمة أشقائها العرب معروف، وأدوار الأشقاء العرب في خدمة مصر ومساندتها ومساعدتها معروف، كل السادة المحترمين أصحاب الفخامة رؤساء الجمهورية على مر التاريخ ياما ذكروا مساعدة الأخوة العرب لينا".
أشار: "فخامة الرئيس عبد الفتاح السيسي كان بيتباهى بمساعدة الأشقاء العرب لمصر، والأشقاء العرب بيتباهوا بمساعدة مصر ليهم.. معروف أن الدول العربية والجزائر أرسلوا قوات رمزية لمصر بعد حرب 67 للدفاع عنها فده شي معروف ومحدش يقدر ينكر"ه.
أضاف: "كل التحية والتقدير لشعب الجزائر وأرجوكوا لا تلتفتوا للكلام اللي اتقال والتعليقات السلبية، معلش كل واحد يقول اللي هو عايزه بس هي الأدوار معروفة والمقامات محفوظة، وكلنا طبعًا نتذكر دور فخامة الرئيس الهواري بومدين في دعمه لمصر، ودور الرئيس العظيم جمال عبد الناصر في دعمه للثورة الجزائرية".
تابع: "محدش يقدر الكلام ده خالص، فربنا يحفظ مصر وكل الدول العربية من كيد الكائدين، ربنا يخلينا لبعض.. مصر 120 مليون شخص تقريبًا يعني، فلو طلع كام واحد كده قالوا شوية كلام يعني سلبي مش مشكلة، لكن الغالبية العظمى بيحبوا الجزائر، ده الشعب المصري كله بيحبها، والشعب الجزائري كله بيحب مصر، تحيا مصر وتحيا الجزائر وتحيا كل الدول العربية.. وربنا يقربنا من بعض دايمًا ومنتفرقش، احنا في أمس الحاجة لأننا نرجع حاجة واحدة، أرجوكم مفيش داعي لأننا نعاير بعض ونقول احنا أحسن، الكبير مبيقولش إنه كبير، المعطاء مبيقولش إنه من على الآخرين بعطاياه، محدش بيقول كده".
رد ياسر جلال على أزمة تصريحاته في مهرجان وهران