مراد مكرم لمهاجمي طه دسوقي: "معجون فن ويستحق الفرصة"

آية سليم

علق مراد مكرم على الهجوم الموجه مؤخرًا ضد الفنان طه دسوقي بعد فقرته الكوميدية في حفل افتتاح الدورة الثامنة من مهرجان الجونة السينمائي، مؤكدًا أنه موهوب ويستحق الفرصة.

كتب "مراد" عبر حسابه الرسمي على "فيس بوك": "لا تربطني أي صلة صداقة أو معرفة حتى بالفنان الشاب طه دسوقي، بس ضايقني أوي كم الهجوم عليه من ناس وصفحات كتير، زي ما يكون الموضوع مقصود ومدبر".

نرشح لك: عمر محمد رياض يعلن عن جزء ثانٍ من "لن أعيش في جلباب أبي"

أضاف: "وأنا هنا هقول شهادة حق، من شخص في نفس المجال.. طه بدأ من الصفر، وبدايته كانت ستاند أب كوميدي، بس فيه غيره كتير أوي ومشهورين أوي في مجالهم، يمكن أشهر منه، بس ماعرفوش يمثلوا، سواء مش موهوبين، أو ما جتلهمش الفرصة... بس طه عافر ودور على الفرصة، ولما جاتله ذاكر وأجاد دور المحامي ولا دور (أولاد الشمس) ولا أدوار تانيه كتير اثبت فيها طه أنه معجون فن، وماحدش جامله وهو يستحق الفرصة".

كما أشاد " مكرم" بتقديم طه فقرة كوميدية في افتتاح مهرجان الجونة، قائلاً: "نيجي بقي لمقدمته في افتتاح مهرجان الجونة، قال كلام في قلب كل ممثل، وقاله ببساطة وتلقائية وخفة ظل وقبول من عند ربنا.. في فعلا كام واحد ما ضحكوش من الحضور ودول اللي الناس دي مسلطة عليهم في بوستاتهم، وفيه مئات تانيين في الحضور وملايين في البيوت سخسخوا على روحهم من الضحك أو على الأقل ابتسموا".

اختتم: "اللي يعرف طه يقوله، ما تزعلش، أنت فنان وموهوب، بس فيه ناس، لأسباب مجهولة، ما بيحبوش الخير لحد".