"أولويتنا الإنسانية لا التدمير".. موقف فيدرا من مقاطعة المنتجات الأجنبية
تحدثت الفنانة فيدرا عن موقفها من مقاطعة المنتجات الأجنبية الداعمة لإسرائيل، مشيرة إلى أنها لن تتخلى عن المقاطعة يومًا وتتحرى الدقة في تعاملاتها اليومية.
كتبت "فيدرا" عبر حسابها الرسمي على موقع التواصل الاجتماعي "فيس بوك": "علشان كل اللي ضد المقاطعة، وكل شوية يدخل على بوست من بتوعي علشان يا يكذبني، يا يقول ليّ الكلام المحفوظ: أنا بطّلت أشتري أي حاجة من أي دولة بتدعم الكيان.. كل هدومي وكل اللي بستخدمه سواء مكياج أو لبس أو حاجة للشعر، بجيبه بعد ما أعمل بحث وأتأكد إن الماركة دي مش في قوائم الدعم".
أضافت: "الصالون اللي بعمل فيه شعري مش سلسلة أجنبية ولا فرع كبير، ده مصري خالص، يا بييجوا ليا البيت، يا بروح لهم في محلهم، وكلهم مصريين وليهم فرع واحد عندنا، والخامات هما اللي بيدوّروا عليها مخصوص علشان تكون براندات مش في المقاطعة".
تابعت: "بالنسبة لسؤال (طب والناس اللي بتتسرح وتتضرر؟) أنا شايفة إن في أولويات.. أولويتنا الإنسانية، وإن فيه ناس بتتقتل وبتتشرّد ودي حاجة أهم من أي فقدان وظيفة مؤقت. وبعد كده، الناس اللي بتترك شغل في الشركات دي بتلاقي فرص تانية عند براندات محلية بتكبر، وده مش كلام.. شركات مصرية اتوسع شغلها لما الناس اختارت المنتجات المحلية، يعني المقاطعة مش هدفها تدمير، الهدف إنه نحفّز صناعتنا ونبني قدرة محلية أقوى".
أشارت "فيدرا": "أنا عمري ما قارنت نفسي بحد، أنا إنسانة بتكلم عن أفعالي الشخصية. أنا مسؤولة عن قراراتي وماليش دعوه بغيري.. وبالنسبة لحاجات زي الموبايل والكمبيوتر: دي للأسف حاجات أساسية في حياتنا ومفيش ليها بدائل وطنية بنفس القوة لحد دلوقتي".
أوضحت: "بس الحقيقة إحنا قلبناها ضدهم: السوشيال ميديا اللي اخترعوها بقينا بنستخدمها سلاح نفضح بيه جرائمهم، وصوت فلسطين بقى واصل للعالم كله".
اختتمت: "كل واحد حر في قراراته، أنا مش بهين حد ولا بزايد على حد، ومش بطلب حد يعمل زيّي. بس لو أنا قررت أخد موقف بالمقاطعة فأنا مقتنعة بيه والحقيقة أنا ما أخدتش الطريق الأسهل.. لو حد شايف ده سخيف، ده رأيه وهو حر فيه.. وشكرًا لكل اللي بيسألوا بجدية وباحترام، وشكرًا لكل اللي بيقدّروا الموقف ويحترموا اختلاف الآراء".