شاهد.. رسالة محمود الخطيب للجهاز الفني ولاعبي الأهلي
وجه الكابتن محمود الخطيب، رئيس مجلس إدارة النادي الأهلي كلمة حماسية للجهاز الفني ولاعبي الفريق الأول لكرة القدم بالنادي، مطالبًا إياهم بتخطي عقبات الفترة الماضية، وبدء فترة جديدة تحقق أمال الجماهير.
نشرت الصفحة الرسمية للنادي "الأهلي" فيديو للخطيب عبر صفحتها الرسمية على "إنستجرام"، وهو يقول: "الكابتن وليد صلاح الدين مدير الكرة، مسئول مسئولية كاملة عن كل ما يخص قطاع الفريق الأول لكرة القدم".
نرشح لك: تفاصيل مشاجرة إمام عاشور مع عاملين في التجمع الأول
أضاف: "الكرة مش أسماء، لكن جدعنة ورجولة.. خدوا بالكم إحنا دلوقت في استاد (مختار التتش) وهو أحد الأساطير اللي كانت موجودة، ومر على النادي أساطير كتيرة أحسن مننا وكله راح.. وأنتم دلوقت واجهة النادي".
تابع "الخطيب": "كلنا بنزول والأهلي اللي باقي، وإن شاء الله هيبقى وهو اللي بيصنع أسماء كل يوم، مينفعش الناس تلعب بأساميها، الناس تلعب بمجهودها".
أكد: "الفترة اللي فاتت مكنتش أحب أبدًا تكون موجودة معاكم أنتم، الأهلي كيان وتاريخ ومبادئ وقيم، وهيبقى كده، وهيذكر اللي هيمشي في نفس الخط بتاعه، ولازم نفكر في ده، وناويين نقدم إيه، وأنا اتكلمت معاكم قبل كده وواضح إننا نسينا، وأنا مش هتكلم تاني".
أشار محمود الخطيب: "أنا عايزكم تقدروا كيان الأهلي وتحترموا جماهيره، هو ده المطلوب منكم، النادي الأهلي بيصبر، لكن مبيقبلش أي حاجة غير اللي يساهم في رفع كيان واسم هذا النادي".
أردف "الخطيب": "كلنا وأنا بالذات عندي ثقة كبيرة في كل واحد فيكم، ننسى الفترة اللي فاتت ونشطب عليها ونشوف اللي جاي، وأنا متأكد لو التركيز زاد، بإذن الله هتحققوا كل اللي بتتمنوه واللي الجماهير يتمناه".
اختتم: "المطلوب منكم، تحافظوا على تاريخكم وتاريخ ناديكم وتقدروا وتحترموا جماهيركم.. مع بعض مدوا إيديكم، نقرأ الفاتحة لبداية فترة جديدة بإذن الله".