محمد سامي: ربنا يديم على الفن نعمة منى زكي

تحدث المخرج محمد سامي عن لقاء جمعه بالفنانة منى زكي، مشيرًا إلى العديد من الأسباب التي جعلتها النجمة الأهم والموهبة الأكبر في مصر.

كتب "سامي" عبر حسابه الرسمي على موقع التواصل الاجتماعي "فيس بوك": "ليه منى زكي؟ كنت بتكلم مع من زكي، بسلم عليها وقعدت أتكلم معاها شوية وأدخل من موضوع لموضوع وبعد ما قفلت سألت نفسي أكثر من سؤال".

تابع: "ليه منى زكي فارقة كتير؟ ليه عندها بريق من نوع خاص؟ ليه هي النجمة الأهم والموهبة الأكبر؟ ليه هي سابقة جيلها بفرق كبير جدًا؟ رغم إن جيلها قوي وفيه زميلات نجوم حقيقيين على جميع المستويات، وموهوبين و ناجحين وقدموا أعمال مهمة ولكن محدش وصل لأنه يبقى منى زكي".

أكمل: "ليه فضلت من أول يوم ليها كممثلة لحد النهاردة أيقونة يصعب تكرارها أو القرب من حجم اسمها و مكانتها على المستوى الفني أو على مستوىوالنجومية والموهبة أو حب الجمهور؟ ليه منى زكي أكثر ممثلة تصدقها وتتوحد معاها؟ليه لو فكرت في ممثلة تلاقي صورة منى زكي هي أول صورة تيجي في بالك؟".

أردف: "باختصار لأن منى زكي مثقفة متعلمة وراقية ومتطورة، مش بتمثل و خلاص ولا بتظهر و خلاص ولا بتتكلم وخلاص، ولا مهتمة بتفاصيل الناس الفاضية، ست كلامها مرتب وأسئلتها ليها معنى وهدف، وأنا بتكلم معاها مبلاقيش لحظة من النقاش دخل في جدل بلا هدف أو كلام من أجل الكلام و خلاص".

أضاف: "الست دي وهي بتتكلم عن الفن تحب تسمعها، ولما توصف الفن تفرح أنك تنتمي له من طريقة كلامها عنه، لما تتناقش معاها في أي موضوع تلاقي وعي وحكمة وتحضر وثقافة. ست ناجحة وزوجة وأم ناجحة. لما تتفرج على أي مشهد ليها بتلاقيها خلته مش عادي. بتشوف تحضير ومذاكرة ورؤية ومجهود واضح وعلام و عقل مترتب وده بيبان في أصغر التفاصيل".

أوضح: "بتقدم أي مشهد صعب ببساطة و شياكة من غير تصنع أو تشتيت، طريقتها في النقد شيك، وتبسيطها لصعوبة أدوار عملتها بيدل على ثقتها في نفسها اللي بلا حدود، حتى لما نبص للقائاتها أو لدورها في المجتمع أو كلامها في ندواتها حتى في الإعلانات اللي قدمتها أو أفلامها و مسلسلاتها أو لبسها في أي ظهور ليها حتى لو مش رسمي، هتلاقيها بتعرف تنتقي وهتلاقي دايمًا في جودة ورمز مشرف للست المصرية".

أشار: "بجد الكلام علي عظمة منى زكي صعب يخلص في بوست، بس حسيت بعد ما قفلت معاها إني عايز أكتب كده من كتر ما استمتعت بالكلام معاها كالمعتاد، يا بخت الفن المصري والعربي بنجمة النجوم منى زكي، و يا بخت كل فنان وفنانة حضرها ونسب لفترة هي فيها، يا بخت كل زمايلها اللي من جيلها أنهم من جيل منى زكي، ويا بخت كل ممثلات الجيل اللي بعدها أنهم عندهم منى زكي يتعلموا منها، خاصة أنها جيل أكبر بس عشان بدأت صغيرة، إنما مش أكبر منهم سنًا بالعكس ما شاء الله عليها قمر وفي عز شبابها و محافظة على شكلها وأناقتها"

وأنهى كلامه: "ربنا يديم على الفن نعمة منى زكي، ودايمًا ناجحة ومتفوقة وبتمتعنا بكل دور بتقدمه وكل مشهد بتأديه، بحبك يا عظيمة ياللي حببتينا ولسه بتحبيبنا أكتر في مهنتنا".