داليا البحيري: ده أسوأ صيف عدى عليا!
كشفت الفنانة داليا البحيري عن تعرضها لوعكة صحية شديدة هي وزوجها، وأنها مرت بالعديد من المواقف السيئة خلال هذه الفترة، وطلبت من جمهورها ومتابعيها الدعاء لها بالشفاء العاجل.
كتبت "البحيري" عبر حسابها الرسمي على موقع التواصل الاجتماعي وتبادل الصور والفيديوهات "إنستجرام": "الحمد لله على كل شئ طبعًا لأننا لازم نحمد ربنا على كل حاجة وفي كل وقت.. اللي يعرفوني كويس هيعرفوا أني من محبي شهر الصيف جدًا، بحب البحر والشمس والسمار ولمة العيلة وكل حاجة في الصيف جميلة حتى فاكهته".
تابعت: "بس الحقيقة السنة دي كانت من أسوأ الصيفيات اللي عدت عليا في الساحل، يتخللها بعض اللمحات الجميلة مع العيلة وبعض الأيام الطيبة، بس للأسف كنت مضغوطة جدًا. كنت بعزل من بيت لبيت، ودي كانت حاجة مفاجأة مش مترتب لها عشان كده كنت مشدودة".
أضافت: "مناعتي وقعت وبقالي 3 أسابيع عيانة جدًا. جالي دور برد أو كورونا أو زي ما تحبوا تسموه، ولما ابتديت أخف شوية (حسن) جوزي اتعدى وتعب جدًا أكتر مني بكتير لدرجة أننا اضطرينا نروح مستشفى".
أكملت: "قعدنا 4 ساعات هناك في الديب فريزير! تكييف عالي جدًا جدًا لدرجة كنا موجوعين من البرد، رجعنا من المستشفى وبعد أقل من ساعة كانت حرارتي طلعت تاني ورقدت ومن يومها أنا مش بتحسن.. ويكتمل السيزون برجوعي سايقة من الساحل وأنا تعبانة لأن كان عندي ارتباط مهم في القاهرة والكاوتش بتاع عربيتي يتفرتك ويطلع دخان".
أردفت: "بحمد ربنا أنه كان عند دخلة البوابات ومكنتش ماشية بسرعة، ده ستر ربنا الجميل، باختصار كان صيف مشحون جدًا بس برضه هفضل أحب الصيف وأفضله.. دعواتكم بقى أخف لأني استويت.. ملحوظة أنا مش بحب أعمل بوستات زي دي عشان أنا عمري ما كنت بتاعت صعبانيات".