عمرو أديب يهاجم مرتضى منصور: الخطيب أخطأ في عدم سجنك

هاجم الإعلامي عمرو أديب مرتضى منصور رئيس نادي الزمالك السابق، بسبب تقديمه بلاغ عن أرض نادي الزمالك في مدينة 6 أكتوبر، كما ناشد الرئيس عبد الفتاح السيسي لإعادة الأرض للنادي.

وقال عمرو أديب خلال حلقة اليوم من برنامج "الحكاية": "من أخطاء محمود الخطيب الكبرى أنه تنازل عن سجن مرتضى منصور، هتتسجن تاني يا مرتضى والزمالك هو اللي هيعيش.. أنتوا عارفين هو مين وبيعمل إيه، وعارفين أنه هيموت يا عيني، اتبهدل بهدلة معزول! كاتب أنه آخر رئيس منتخب لنادي الزمالك، ده واخد لقب مرسي، واخرته هتبقى زي مرسي بالظبط".

تابع: "اللي قدم البلاغ في أرض نادي الزمالك هو المعزول مرتضى منصور ، هيموت الراجل، الغل والحقد، اللي بيقولك بحب النادي، أنت وعيالك دمرتوا النادي يا مرتضى، وأنا مبخافش منه، أنا من 20 سنة قولتهاله مبخافش منك.. ما تردوا عليه ما تعملوا له حاجة، ولا هو مسنود؟ ارجع تاني واسأل هو مين اللي بيسند مرتضى منصور في البلد؟ هو مرتضى منصور أقوى من نادي الزمالك؟ الزمالك عايز يعيش ويتقدم، اخد خطوات واضحة وبيسدد الديون اللي عملها هو وعياله، اللاعيبة الكسر والعمولات اللي خدها".

أوضح: "أرض أكتوبر روح الزمالك، السيد وزير الإسكان ووزير الشباب والرياضة ورئيس وزراء، فخامة الرئيس عبد الفتاح السيسي.. أي حد ممكن يقول قطعة أرض عايزين منها إيه يعني؟ خدوا أي حتة أرض، لكن هذه القطعة بالتحديد اللي مر عليها سنين ومجالس إدارة لم تفعل بها شيء ولم تستثمرها.. أنا مش هقولك إن نادي الزمالك كان صحيحا، هقولك إن كان عندنا مشاكل كثيرة ولكن أتى مجلس الإصلاح الموجود حاليا".

واصل: "أتى مجلس إدارة الزمالك، مجلس الإصلاح الموجود حاليا، لكن لازم تعذره ده وارث تركة سيئة جدا، وارث فساد ومشاكل وديون، بيحاولوا يشموا نفسهم.. أنا لا أتحدث عن نادي الزمالك، علشان أنا زملكاوي، أنا مش عضو في نادي الزمالك، أنا أتحدث عن نادي الوطنية المصرية، ومؤسسة رياضية مصرية تريد أن تتنفس، قطعة الأرض دي أمل النادي، هو ده المستقبل".

اختتم مناشدا الرئيس الرئيس عبد الفتاح السيسي: "هذه الأرض هي أمل الزملكاوية.. سيادة الرئيس أنا مفوض من جمهور ومجلس إدارة الزمالك، إننا نطلب هذه الأرض ونناشد حضرتك أن تنظر بعين المسؤولية والتربية وأنت تعلم معنى الشباب والرياضة".