أوس أوس يروي موقفًا محرجًا له في إيطاليا
روى الفنان محمد أسامة الشهير بـ أوس أوس موقفًا محرجًا تعرض له في إيطاليا خلال رحلته لتصوير فيلم "رمسيس باريس".
قال "أوس أوس" في لقائه مع المخرج معتز التوني في بودكاست "فضفت اوي": "كلموني في فيلم (رمسيس باريس) عشان محمد ثروت كان عنده مشكلة أنه يسافر فقالولي مش هينفع يروح وكده فأرجوك تعالى".
تابع: "اتصرفت بسرعة وطلعت تأشيرة شنغن وشوفت الدور وعملت شعري أزرق، وكنت عامل دوجلاس زرقاء. وطلعت التأشيرة من سفارة إيطاليا، وقولتلهم احجزولي إيطاليا الأول وبعدين أخد داخلي لباريس، فنزلت إيطاليا أنا والناس اللي في الطيارة بس، كنا يوم 2 يناير ومفيش حد في المطاري غيري أنا والناس اللي نازلة من الطيارة، وكنا ساعتها في كورونا".
أكمل: "الراجل في المطار قالي أنت جاي هنا ليه؟ قولتله أنا باجي إيطاليا كل سنة، ومش عايزة أقوله إني ترانزيت ورايح فرنسا لأنه هيدخلني من الصالة اللي جوا، كنت عايز أخد ختم دخول إيطاليا عشان تبقى الدنيا أمان وبعدين أروح للسفر الداخلي".
أضاف: "فسألني هتقعد فين وإيه اسم الفندق اللي هتقيم فيه؟ قولتله صديقي مستنيني جنب المطار.. راح جه ظابط وقالي اتفضل معانا فأنا مش فاهم في إيه، روحت معاه ودخلت أوضة كلها ناس محبوسة، فدخلت قولتلهم السلام عليكم، أي حد عربي! مفيش كله بصلي كده والناس شكلها مرعب أصلًا.. فجالي الظابط وجايبلي ورقة كبيرة بالإيطالي المفروض أحلها، أسئلة كتير".
استطرد: "وأنا طبعًا عامل مجنون قولتله أنا مش فاهم أي حاجة.. فاللي اكتشفته أني جاي بفيزا سياحة ومفيش تأشيرات سياحة لأنهم قافلينها، فكل اللي كان معايا دخلوا تعليم أو إقامة أو الحاجات دي كلها، وأنا كنت مطلعها من القنصلية لأن الدنيا قافلة فعشان ألحق أطلعها، فقالي كلم صاحبك اللي واقف برا، قوتله معيش رصيد".
تابع: "راح واخد موبايلي ووصله بواي فاي المطار وقالي كلمه فيس تايم.. فكان لازم أحل المشكلة، فروحت مكلم الراجل اللي في القنصلية اللي روحتله، مصري وبيتكلم إيطالي فقولتله أنا دلوقتي في إيطاليا، قالي إيه اللي وداك إيطاليا! قالي الشنجن دي بتخش أي بلد".
أضاف: "فكلمهم وقالهم ده ممثل مصري وجاي يصور في باريس، فجاي يقعد يومين في إيطاليا لأنه متعود ييجي في بداية السنة.. قالوله أوك ومشيوا كلهم وأنا فضلت قاعد مستني، المهم نادوا عليا والظابط قالي تمام وختم لي ختم الدخول وقالي فقط يومين ولازم تسيب البلد قولتله ماشي بس طلعوني".
فيلم "رمسيس باريس" بطولة هيفاء وهبي ومحمد سلام وحمدي الميرغني ومصطفى خاطر ومحمد ثروت، من تأليف كريم حسن بشير، وإخراج أحمد خالد موسى.