"كيف أتوقف عن إظهار شعري من الحجاب؟".. مصطفى حسني يُجيب
أجاب الداعية الإسلامي مصطفى حسني على سؤال إحدى المتابعات التي أرادت أن تتوقف عن إظهار شعرها من أسفل حجابها، موجهًا إليها عدة نصائح تُساعدها في اتخاذ هذه الخطوة.
نشر "حسني" مقطع فيديو عبر حسابه الرسمي على موقع التواصل الاجتماعي وتبادل الصور والفيديوهات "إنستجرام"، يُجيب فيه على سؤال إحدى المتابعات التي أرسلت له: "إزاي أبطل أبين شعري من تحت الطرحة؟ عايزة أتوب ومش عارفة أعمل إيه؟".
قال: "والله ده سؤال صادق اوي.. الإنسان كتلة من الاحتياجات ومن ضمنها القبول.. الشكل الحلو ربنا والناس بيحبوه ولكن ده في إطار ما يرضاه الله، لأني لو لابس أغلى حاجة وأنا أحلى واحد في الدنيا، أقسم بالله ما تعرف تحبني إلا لما ربنا يأذن".
تابع: "كتير من الأوقات البني آدم بيعمل حاجات يتصور بيها أنه بيقرب الناس له وهو بينفرهم لأنه مش واخد إن من ربنا أن يبقى عنده القبول.. عشان كده الشعر اللي بينزل ده نفسيًا الإنسانة بتحس أن جزء من جمالها باين فتبقى حاسة أنها راضية عن نفسها وشكلها جميل وهي بتبص في المراية".
أكمل: "على فكرة شيء شرعي جميل إن الواحد لما يبص في المراية يشعر بجماله ولكن جوا الإطار اللي ربنا سبحانه وتعالى شرعه له، وبالتالي الشعر من الأجزاء اللي المفروض تُستر عند الست أمام الأجانب الذين ليسوا من المحارم، فلو بينتي شعرك ممكن فعلا شكلك يبقى جمي بس ربنا ميرضاش عن حاجة زي كده، ولن يستطيع الإنسان إن يُرضي نفسه ويبص في المراية ويبقى راضي عن نفسه إلا لما ربنا يديله الإذن أنه يرضى عن نفسه، ولن يستطيع الإنسان أن يحصل على بعض القبول من الشكل الحلو إلا لما ربنا يديله الإذن بالقبول".
نرشح لك: بعد المطالبة بمنعه.. أحمد السبكي: فيلم "سفاح التجمع" لا علاقة له بالواقع
أضاف: "فسواء كان الإنسان بيتجمل لنفسه وده أغلب الناس، أو بيتجمل للحصول على القبول الاجتماعي، فلا هعرف أرضي نفسي ولا حد إلا بإذن وأمر من الله، عشان كده شرحت لحضرتك الفكرة، استعيني بالدعاء وجربي كتير جدًا أنك تنزلي وشعرك كله متداري تحت طرحتك الكريمة، وربنا سبحانه وتعالى يرضيكي ويعطيكي فوق ما يرضيكي".