هند سعيد صالح في ذكرى وفاة والدها: "السنة دي الأصعب"

أحيت هند سعيد صالح الذكرى الحادية عشرة لوفاة والدها برسالة مؤثرة، مشيرة إلى أنها فخورة وتحمد الله عز وجل دائمًا لكونها ابنته، ومطالبة الجمهور بالدعاء له.

كتبت "صالح" عبر حسابها الرسمي على موقع "فيس بوك": "إمبارح كان ذكرى ميلاد بابا الـ85، والنهارده ذكرى وفاة بابا الـ11، ما عرفش عدوا إزاي! عدوا بفضل ربنا وكرمه ونعمه عليا إني أعيش وأتعايش.. وبإني شايفة نسخة مصغرة من بابا شكلًا وموضوعًا وكوميديا وحتى النظرات معايا في البيت اسمه سليم (ابني)".

تابعت: "عدوا بحنية وطيبة كلام الناس عن بابا، اللي دايما بيهديني وبيحسسني إن سعيد صالح ده مش بتاعك لوحدك.. إحنا لينا فيه زيك ويمكن أكتر، وحقيقي بحس بحزن وبحب الناس في (البوستس) اللي بتتكتب عنه سواء في عيد ميلاده أو ذكراه".

أشارت: "أوقات فجأة من غير أي تواريخ وأحداث، ومن ناس أعرفها وناس ما عرفهاش بشوف كلامهم عنه صدفة، وبصدق كلامهم، لأنه طالع من القلب؛ فبفرح .. وبحمد ربنا على نعمة أنعم بيها عليا لوحدي إني (بنت سعيد صالح)".

أضافت: "بس السنة دي كانت من أصعب السنين، ويمكن عشان الظروف النفسية الصعبة اللي لسه بمر بيها بسبب مشكلة جوزي اللي اتكلمت عنها من فترة ولسة قائمة، ويمكن عشان سنة 2014 عيد ميلاد بابا كان خميس ووفاته كانت جمعة؛ فـ تفاصيل كل حاجة مؤلمة حصلت السنة دي بتتعاد تاني قدامي".

اختتمت: "بس كله بيعدي وهيعدي، الحمد والشكر لله.. من فضلكم زي ما بتحبوا بابا وبتدعوا له من قلبكم، ادعوا ليّ لأني في أمس الحاجة للدعاء".