تحدثت الإعلامية داليا فرج عن طليقها ووالد بناتها المخرج الراحل سامح عبد العزيز، الذي توفى صباح أمس الخميس، إثر تعرضه لأزمة صحية مفاجئة.
نشرت "فرج" صورًا تجمعها بالراحل عبر حسابها الرسمي على موقع التواصل الاجتماعي "فيس بوك"، موضحة: "اللي بينا حاجة ما فيش غيرنا فاهمها؛ فاهمين تفاصيل بعض وبنفهم بعض من نظرة، نتخانق بقى أو نزعل ونحلف ما نكلم بعض تاني وتقريبا نص الصيام اللي بصومه رايح على الحلفان".
تابعت: "أول ما تكلمني أنسى وأصالحك على طول عشان عارفة أن قلبك طيب وإن أنت (بيبي) كبير وضخم.. وعشان اللي جوانا بتاعنا إحنا وبس، ومش حاجة ممكن تفهموها أو تسموها".
أضافت"فرج": كان لينا تأثير قوي على بعض، وفي حته جوه كل واحد فينا للتاني خاصة ومختلفة.. يا عشرة عمري وحبيبي وأبو بناتي".
أشارت: "رغم أنك مشيت بس اللي مريحني أن آخر 20 يوم كنا مع بعض كلنا على طول.. يا رب مكونش قصرت في حقك.. هتوحشني أوي يا حبيبي يا غالي، زي ما كنت بقولك دايما (أنت الغالي) وترد (حبيبتي)".
اختتمت داليا فرج حديثها، قائلة "مش مصدقة إني بقولها ربنا يرحمك يا حبيبي ويسكنك فسيح جناته، ويقدرني على المسئولية.. نفسى أنام وأصحى ألاقي ده كابوس ومش حقيقي، بدري أوي أوي يا حبيبي.. لا إله إلا الله.. هتوحشني يا موحة".يذكر أن المخرج الراحل سامح عبد العزيز، كان قد أُصيب بعدوى فيروسية في الدم، أسهمت في رفع مستوى السكر بشكل خطير قبل أن تتدهور حالته الصحية فجأة.
وتم تشييع الجنازة عصر أمس الخميس من مسجد الشرطة في الشيخ زايد، ودُفن في مقابر الأسرة بالسويس.
كان سامح عبد العزيز قد تخرج من المعهد العالي للسينما عام 1996 وبدأ حياته في إخراج البرامج، ثم تحول إلى السينما بإخراج أول فيلم عام 2005 الذي حمل اسم "درس خصوصي"، ثم توالت أعماله الناجحة مثل أسد وأربع قطط، الفرح، كباريه، حلاوة روح وتيتة رهيبة وحملة فريزر.
وتعد آخر أعمال الراحل سامح عبد العزيز، فيلم "الدشاش"، بطولة محمد سعد، زينة، باسم سمرة وخالد الصاوي، ومسلسل "شهادة معاملة أطفال"، في دراما رمضان 2025، بطولة محمد هنيدي، صبري فواز، سماء إبراهيم.