النص الكامل لمكالمة أنغام عن شيرين عبد الوهاب في "كلمة أخيرة"
علقت الفنانة أنغام على الشائعات المنتشرة بشأن إطلاقها حملات للإساءة لـ شيرين عبد الوهاب بعد حفلها بمهرجان موازين.
قالت "أنغام" في مداخلة هاتفية مع برنامج "كلمة أخيرة" مع الإعلامية لميس الحديدي على شاشة ON: "أنا مش بتاعة مشاكل وفي حالي، الظلم المرة دي أنا غير قادرة على احتماله، وغير قادرة على السكوت ولا الكلام على فكرة، بس الأمور وصلت لتجريح بطريقة غير مقبولة وغير محتملة، وصلت لشتيمة وتلقيح من ناس المفروض مسئولة وزمايل كمان".
نرشح لك: طبيب شيرين: تعرضت لأزمة صحية قبل حفل موازين
تابعت: "التلقيح بتاع إحنا عارفين مين ورا الحملة، وفيه مواقع كتبت اسمي، وناس بتبعت لي شتيمة بتوصل بتمني الشر".
أشارت إلى أنها تعرضت لوعكة صحية مؤخرا أدت إلى دخولها المستشفى، موضحة: "وأنا على سريري في المستشفى لقيت ناس بتبعتلي وعرفت إن شيرين على المسرح وفيه مشكلة.. طيب أنا بتشتم ليه؟ أنا مالي، إيه علاقتي باللي حصل مع شيرين في الحفلة؟
دي مش أول مرة وأنا تحملت سنين فاتت، طول الوقت تلقيح كلام حتى منها شخصيا، وعمري ما علقت وزعلت بيني وبين نفسي وعذرتها كتير.
إنما توصل بقى إن كمان بنوجه الجمهور كله والرأي العام ناحية أنغام وإني بتاعة مؤامرات وتشيطن أنغام وتطلعني بشن حملات على زميلة!".
أردفت باكية: "أي شخص هيتمادى ويغلط ويذكر اسمي، مش هسكت تاني علشان أنا تعبت، كفاية كده حرام وعيب والظلم ده كتير وكفاية حقد وكره وسيبوني في حالي، محدش له دعوة بنوايايا، أنا نيتي بتحاسب عند ربنا، سيبوني لربنا إنما ظلم كتير كده عليا، كفاية توجيه حملات عليا".
ذكرت: "أنا رفعت بالفعل قضية على شاب وكسبتها واتسجن علشان كتب على تويتر "مش هترحمي شيرين بقى يا أنغام".
اختتمت: "كفاية مقارنة مقرفة، عقيمة، سخيفة، بليدة وكفاية ضغينة، كفاية مقارنة هي اسمها شيرين وأنا اسمي أنغام، هي ليها جمهور عريض وأنا ليا ناس بتحبني.
هي ربنا يكرمها وأنا لو مش عايز تدعيلي ماتدعليش بس ماتدعيش عليا ومتظلمنيش، كفاية ظلم".