ملك زاهر تكشف عن تعرضها لوعكة صحية مفاجئة

كشفت الفنانة الشابة ملك أحمد زاهر، عن تعرضها لوعكة صحية مفاجئة منذ 3 أيام، وطالبت الجمهور ومتابعيها بالدعاء لها، وعدم الحكم على حياتها من خلال مواقع التواصل الاجتماعي.

كتبت "زاهر" من خلال خاصية "ستوري" عبر حسابها الرسمي على موقع التواصل الاجتماعي وتبادل الصور والفيديوهات "إنستجرام": "أنا عمري ما كنت بنزل غير الحاجات اللذيذة أو الهزار أو الحاجات الإيجابية، ولما كنت بنزل حاجة سلبية كنت باخدها بهزار أو بنزلها للأصدقاء المقربين وبهزر بيني وبين صحابي".

تابعت: "بس بجد حاسة أن الفترة الأخيرة بيجيلي تعليقات كلها ما أنتي عايشة ومبسوطة وإحنا مش عايشين وإيه كل اللي أنتوا فيه، وحاسة أن في ناس باصة على أتفه الحاجات اللي ممكن تكون عندي أو بتبسطني، زي مثلًا أني أروح الجيم أو أخرج مع صحابي أو يكون شكلي حلو وأنا رايحة إيفنت معين".

أضافت: "حبيت بس أقولكم إن الحياة مش وردي، أنا بقالي 3 أيام تعبانة شوية وعندي حاجة لحد دلوقتي مش فاهمين سببها وجت فجأة، في حوالي نص ساعة قبلها كنت كويسة ومن ساعتها مش عارفة أنزل أو حد يشوفني باللي أنا فيه ده ونفسيتي وحشة اوي".

أكملت: "أنا بحكي الكلام ده عشان تعرفوا بس أن حياتي فيها الحلو والوحش والله زي أي حد، بس أنا بحب دايمًا أشير الحلو بس وغالبًا ده غلط، فقررت أشارككم كمان الوحش

ومع أن اللي بيحصلي دلوقتي ده أنا بحمد ربنا عليه وعارفة أنه بإذن الله هيكون بسيطة وإن شاء الله هخف وكله هيكون تمام بس هو مخلي نفسيتي وحشة اوي. حقيقي كل اللي طلباه أنكم متحكموش على حد من مواقع التواصل الاجتماعي، أو من ظهوره في أي حاجة، لأنها بتوري بس يمكن 20% من حياته وادعولي أخف بسرعة، شكرًا".

اختتمت كلامها: "الهدف من الستوري دي مش أن أي حد يقلق لأن الحمد لله أنا كويسة وإن شاء الله اللي عندي ده له حل وأنا تمام مفيش حاجة مقلقة، أنا بس حسيت أني محتاجة أشارك الوحش زي ما بشارك الحلو مش أكتر".