منة عدلي القيعي تكشف تفاصيل معاناتها مع صعوبة التنفس

شاركت الشاعرة الغنائية منة عدلي القيعي، الجمهور بمنشور كشفت من خلاله عن معاناتها مع صعوبة التنفس على مدار الـ 7 أشهر الماضية.

نشرت "القيعي" عبر حسابها على موقع "فيسبوك" صورة لها وهي تمسك بعدة جوائز، وعلقت عليها كاتبة: "حكاية مكنتش ناوية أحكيها بس هحكيها.. من 7 شهور واحنا لسة بنسخن عشان نحضر لشغل رمضان، حسيت بصعوبة في التنفس كانت بتزيد كل يوم إلى أن تحول الموضوع لنوبات اختناق تقريبا.. كانت بتتسبب في تسارع في ضربات القلب توصل لـ 180 أو190 وأوقات كتير الموضوع كان بيطول كنت بحس إني مش هعديها".

تابعت: "بعد شهر واتنين من الفحوصات والتشخيصات المختلفة جالي نوبة من دول وانا سايقة وتسببت في حادثة كانت صعبة شوية، راحت فيها عربيتي والحمد لله برضه نجوت منها بإصابات خفيفة وكنا بنحمد ربنا ألف حمد، بعدها الأمور تدهورت أكتر، والنوبات كانت بتوصل لمرتين و3 و5 في اليوم الواحد.. فيه أيام كنت بوقف عربيات ناس معرفهاش في الشارع وأقولهم خليكوا معايا من الخوف، وابتديت رحلة علاج طبيعي للتنفس وكنت حرفيا بتعلم إزاي أتنفس من الأول، واليوم اللي كنت بتنفس فيه "صح" لدقيقة متواصل كنت بعيط من الفرحة، ويوم بيعدي ويوم أحس انه ما بيعديش لحد ما وصلنا لهنا".

أضافت: "الـ 7 شهور دول هما اللي ربنا كرمني فيهم بالأغاني دي "صاحبي يا صاحبي" و"كل سنة" و"تقابل حبيب" وإلى آخره من الشغل اللي اتعرض في رمضان 25.. أغاني منهم اللي اتكتبت وانا في مستشفى واللي اتكتبت وانا علي جهاز تنفس واللي اتكتبت وانا بعيط، فيه أيام من الإحباط كنت بفكر ابطل احاول أخف، بس عمري ما فكرت أبطل كتابة وكنت بدعي ربنا يكرمني ويجازيني وكنت بكلمة وأقوله يارب وقفني ووقفني علي رجلي تاني".

اختتمت حديثها: "اللهم لك الف حمد وشكر.. 7 جوايز حصيلة 7 شهور مروا بكرم الله ولطفه.. (فيه جايزتين مش معايا).. شكرا لأهلي وعيلتي وجوزي وصحابي والناس اللي اشتغلت معاهم كلهم، طلعت عنيكوا وقلقتكوا وعملتلكوا إزعاج واستحملتوني.. شكرا من كل قلبي".

#