سناء منصور: كنت هقدم دور داليدا في "اليوم السادس"

ذكرت الإعلامية سناء منصور، أنها كانت ستقدم صوت شخصية "صديقة" في فيلم "اليوم السادس"، من إخراج يوسف شاهين. والتي قدمتها الفنانة داليدا، بعدما رفضت الفكرة وقررت أنها ستقدم الشخصية بصوتها.

قالت "منصور" خلال فيديو نشرته قناة "dmc" على يوتيوب، إن المخرج يوسف شاهين كان يقدم فيلم "العصفور" في مهرجان "كان" السينمائي، بينما كانت هي تعمل في الراديو. مشيرة إلى أنها قابلت يوسف شاهين في المهرجان وسألته أثناء الحوار عن الفنانين المتواجدين في الفيلم ووصفت هذا السؤال بغلطة عمرها، لأنه غضب منها بشدة.

أضافت: "لقيت يوسف اتجنن وقال لي الفيلم بتاع يوسف شاهين أبطال مين اللي بتتكلمي عنهم، أنا سكت بس اتغظت منه فقررت اضايقه شوية فقلت له على فكرة يا أستاذ يوسف أنا مبفهمش أوي في الأفلام قال لي لأنك حمارة، قولت إيه الراجل الغريب ده ودي كانت البداية عمري ما قابلته خالص قبلها".

أشارت: "أنا مبقتش عارفة أودي نفسي فين، واتقابلنا بعد اللقاء ده، وكان معانا الأستاذ ريمون اسكندر، قال لي تعالى نشرب شاي أنا وأنتي ويوسف شاهين قلت له لا مش عايزة، قال لي ده يوسف إنسان جميل وأنتي استفزتيه، رحت واستظرفته جدا وابتدت صداقة حقيقية بيني وبين يوسف شاهين واستمرت لحد 2008 عند وفاته".

أوضحت: "وفي يوم من الأيام لقيته بيطلبني في التليفون من باريس، قالي لي لمي حاجتك وتيجي، أنا بعمل دوبلاج فيلم اليوم السادس بطولة داليدا عايزك تيجي أخد صوتك وتعملي داليدا كصوت لأن العربي بتاع داليدا مكسر مينفعش تطلع فلاحة، مش قادرة أقولكم فرحتي قد إيه، بعد يومين بالظبط، قال لي متجيش داليدا قالت لا هطلع في الفيلم بصوتي".