فريق "مسار إجباري" يكشف كواليس ألبوم "نص الحاجات"

تحدث أعضاء فريق "مسار إجباري" عن تحضيرهم لألبومهم الجديد "نص الحاجات"، والذي تم طرحه على مراحل ويضم 5 أغنيات (نص الحاجات، شكرا، بقيت غريب، بكلمة، آسف).

قال أحمد حافظ خلال لقائه مع "بالعربي ET": "كل أغنية خدت وقتها وخدت تركيزها، أحياناً أغنيتين أو ٣ أغاني شغالين في وقت واحد، في أغاني خلصت بسرعة جداً وفي أغاني خدت وقتها، وكل أغنية فيها اختلاف عن التانية".

وعن أغنية "حبة طبطبة" قال "حافظ": "الكلام بتاعها جديد ومختلف عن الأغاني الشعبي إن هو بتتكلم عن ناس بينهم عشرة طويلة أو حد عايز يشكر ناس مروا في حياته ومكنش في فرصة إن هو يتصل بيهم، كنا عايزين نعملها حاجة متسلطنة شوية.

من جانبه قال أيمن مسعود: "الألبوم ده يمكن أول مرة نعمل موضوع الأغاني المنفردة، إن إحنا ننزل بألبوم أغاني متفرقة مش ألبوم نازل كله على بعضه، وأغنية (نص الحاجات) كتبها محمد بحيري أغنية مؤثرة جداً وعميقة وإحنا بنحب الحاجات دي كلنا شبه أغنية حاوي بس بعد تطور ١٥ سنة".

أما عن أغنية "بقيت غريب"، قال: "شيروفوبيا كان معانا فيها سلمى أبو ضيف وكنا بنحاول إن إحنا نعمل نفس الموضوع تاني في بقيت غريب كاستكمال للأغنية لكن للأسف الظروف معرفناش نظبط مواعيدنا مع بعض خالص فعملنا الفيديو مع ندى كبديل".

وعن أغنية "كلمة" التي كانت تتر مسلسل "الهرشة السابعة" الذي عُرض في السباق الرمضاني الماضي قال "مسعود": "أغنية كلمة في مسلسل الهرشة السابعة دي كانت قريبة مننا جداً لأن المسلسل كان قريب مننا كمان، من أول ما سمعنا القصة على طول الأغنية أسرع واحدة اتعملت في الألبوم كله".

في نفس السياق قال محمود صيام: " أغنية (حبة طبطبة) كلام محمد بحيري كان متحمس لها جداً وبيعملها لوحده من بدري، كان معانا دياب برضه صاحبنا من زمان هو فنان جداً ومطرب قوي جداً وممثل ما شاء الله عليه دلوقتي قوي جداً جداً".

وعن آخر أغنيات الألبوم يقول تامر عطالله: "كان نفسي نعمل أغنية أفرو، ف لما جت آسف وأنا بوزع الأغنية وهاني بيلحن، وأنا بركب البيت لاقيتها حلوة أوي، سجلنا مع واحد صاحبنا في استديو في فرنسا".

كما أوضح هاني الدقاق سبب طول مدة تحضير الألبوم قائلا: "كل أغنية من دول كنا بنمسكها نوزعها بأربع خمس طرق لغاية ما استقرينا على الأشكال دي اللي نزلناها، لكن إحنا ناويين نبين الأشكال التانية من خلال الحفلات".