الشركة المنظمة لحفل ترافيس سكوت: خسائر تتخطى الـ 300 مليون جنيه في حالة إلغاء الحفل

قال محمد سراج، العضو المنتدب لشركة “تيكيتس مارشيه”، إنه لم يتم التجهيز لحفل ترافيس سكوت في الأهرام إلى الآن، موضحا أن الصورة المتداولة لترافيس سكوت أمام الأهرامات ليست حقيقية.

أضاف “سراج” خلال مداخلة هاتفية في برنامج “الستات”: “للأسف إحنا لحد دلوقتي مدخلناش منطقة الأهرامات، ومبدأناش نجهز لسه، مقدرش أقول سكوت وصل مصر ولا لا، بس الصورة اللي متداولة مش حقيقية، واللي أقدر أأكد وصولهم هما المدعوين اللي كان عازمهم رعاه الحفلة”.

نرشح لك: مصطفى كامل: لن أتحمل مسؤولية حفل ترافيس سكوت بمفردي

أشار: “المدعوين دول 46 انفلونسر من أكبر الانفلونسرز في العالم، والناس اتقال لهم متجوش لحد ما نتأكد، قالوا لا دي مصر، إحنا عايزين نروح، نتمنى زيارتهم تبقى زيارة زي ما هما مستنينها.. إحنا خايفين نوقف شغل ناخد الموافقة، وخايفين نكمل مناخدش الموافقة، إحنا واقفين في النص مش عارفين نعمل إيه، أيا كان اللي هيجيلنا، إحنا هنحترم القرار”.

أوضح: “إحنا كنا محتاجين ندخل الهرم قبل الحفل بعشر أيام عشان نجهز، ودلوقتي في 3 أيام، أنا مشوفتهاش حصلت في 3 أيام، معرفش هتحصل معجزة ولا لا.. ولو الحفل محصلش في خساير فوق الـ 300 مليون جنيه، الشركة المنظمة هي اللي هتتحمل كل المصاريف”.

أردف: “كله بيدعمنا بس محدش بيدينا ورق، إحنا محتاجين ورقة يا آه يا لا، إحنا لازم النهاردة بليل أو بكرة الصبح بالكتير ننزل بيان للأجانب اللي جايين الحفل يا نقولهم تعالوا، يا نقول لهم إحنا آسفين الحفلة اتلغت وهنرجع لكم فلوسكم، ولو جالنا رد هنتصرف ونخليها تحصل”.