بدرية طلبة: اللي ييجي عليا ببقى وحشة وبفضل ورا حقي

وجهت الفنانة بدرية طلبة رسالة للجمهور، بعد منشورتها السابقة التي حملت رسائل قاسية لأحد الأشخاص والذي تحدث عن خضوعها للعديد من عمليات التجميل.

كتبت “طلبة” عبر حسابها الرسمي على موقع “فيس بوك“: “أنا طول عمري في شغلي وفي حياتي العادية بتعامل على طبيعتي وعلى ما اتربيت عليه بحترم الصغير قبل الكبير، ومش بعرف أظلم ولا أجي على حد وياما أمنت ناس ونصبوا عليا وياما وثقت في ناس وخذلوني وياما وقفت وقفات جدعنة مع ناس ميستهلوش”.

أضافت: “ودايما جبارة خواطر وباجي على نفسي كتير علشان اللي حواليا لكن اللي ييجي عليا بتحول وببقى وحشة قوي وبفضل ورا حقي لمجرد إحساسي بالظلم والإهانة قلبي بيسود، لأني متعودة أن الكل بيحبني وبيحترمني وإني مستهلش اللي بيحصلي”.

اختتمت: “وبعتذر لكم عن الكام بوست اللي كانو رد فعل مني على شخص نكرة ميستهلش أصلا ارد عليه، لأني أكبر من كده وعرفت أنه شخص مريض وديا طريقته وده أسلوبه وياما ضايق ناس.. أنا بعتذرلكم، لأن صفحتي عليها ناس محترمين وزملاء أفاضل، علشانكم همسح كل القرف اللي نزلته بسبب ردي عليه، وحسبي الله ونعم الوكيل فيه وفي اللي وراه ودا كفاية قوي وأقبلوا اعتذاري”.

كانت الفنانة بدرية طلبة ردت ردا قاسيا على أحد الأشخاص دون ذكر اسمه والذي وجه لها رسالة حول خضوعها للعديد من عمليات التجميل.

نشرت “طلبة” العديد من الصورة الخاصة بها من أعمالها السابقة خاصة “الأجهر” عبر حسابها الرسمي على “فيس بوك”، معلقة: “يوم ما تعمل راجل تعمل على أسيادك وأسياد أهلك,.. دي صور من أعمالي قبل رمضان وفي رمضان علشان اللي بيقول عمليات التجميل خلتني واحدة تانية مش أنا، وأن اسم الله عليه اتخضت لما شافتني في مسلسل الأجهر ورمضان كريم حاطة ميكيب أوفر وإني بعمل تجميل علشان أبقى حلوة يمكن أعمل دور هانم ومش هيليق عليا علشان أنا شكلي وصوتي شعبي!”.

أضافت: “في حاجة اسمها تجميل بالميكب وفيه حاجة اسمها فلاتر العالم كله بيستخدمها يتصور بيه.. ده أنا بطلع في أي برنامج أول آه عاملة بس مش بالأوفر اللي بتتكلمي عنها وبتتريقي وبتتنمري بيها عليها لدرجة أن المتابعين هاجموك.. اللي بيته من إزاز ميحدفش الناس بالطوب”.

تابعت: “اللي عايزة تحلي نفسها مش هتطلع تقول سنها وتحكى عن أحفادها وتعمل أدوار زي اللي بعملها أنا بعمل اللي أحافظ بيه على شكلى وعلى نفسي ودا الست العادية بقت تعمله والشعبية اللي مش عجباك شرف ليا إني معجبش واحد زيك”.

اختتمت: “شوف بقي حاجة تانية قولها علشان أنا لسه زي ماأنا العالم كله بيحبني ومحدش أخد ولا يقدر ياخد مكاني بدرية طلبة ملكة الكوميديا في مصر والوطن العربي غصب عنك وعن اللي زقك وعن اللي شبهك”.