شريف مدكور عن رضوى الشربيني: عملت مدرسة في شكل برامج المرأة

دينا رحمو                        شريف مدكور

تحدث الإعلامي شريف مدكور، عن صداقته بالفنان مراد مكرم والإعلامية رضوى الشربيني، مشيرا إلى أنهم يقدمون برامج متميزة يصعب تقليدها، مضيفا: “نعمة وفضل أن كل واحد فينا عنده الجزئية بتاعته”.

قال “مدكور” خلال مداخلة هاتفية مع الإعلامية رضوى الشربيني في حلقة اليوم من برنامج “هي وبس” المذاع عبر شاشة “cbc سفرة”: “إن القاعدة مع مراد وعيلته وهما بياكلوا تفتح النفس أوي.. حماته ربنا يديها الصحة أكلها طعمه يهبل، ورشا الأكل بتعمله حلو أوي، ومراد وهو بيأكل وقعدته والأجواء اللي بيعملها اللذيذة تفتح نفسك.. ودي حاجة من عند ربنا”.

نرشح لك: شاهد.. رضوى الشربيني تنهار من البكاء على الهواء بسبب والدتها

فيما قالت رضوى الشربيني، إنها ترغب في تقديم الشكر على الهواء لشريف مدكور بسبب دعمه لها في بداية مسيرتها المهنية، موضحة: “عايزة أشكر شريف مدكور على الهواء، لأن أنا أول ما دخلت (cbc سفرة) كنت مرعوبة وكنت خايفة أطلع هواء أو أسجل.. ومحدش يعرفني، والنجم شريف مدكور مد لي إيده وقالي تعالي هستضيفك”.

أضافت: “عمل حلقة حلوة جدا ليا.. وسألني على كل الحاجات اللي كان نفسي اتكلم عليها، رغم أننا مش متفقين.. وكم من الدعم والحب ولا نفسنه ولا قلب أسود ولا خوف”.

ليرد “مدكور” بأنها تستحق كل خير، مضيفا: “إحنا أخوات وزملاء أنا بعزك جدا على المستوى الشخصي والإنساني، أنتي تستاهلي كل الخير وأنتي عاملة حالة حلوة، كون الناس تبقى معاكي أو تختلف معاكي.. ولكن رضوى الشربيني عملت مدرسة في شكل برامج المرأة، حتى لو في ناس بتنتقدك أو معاكي.. بس ليكي الحتة بتاعتك اللي صعب حد يخترقها أو يقلدها، ولو حد قلدك يبقى ماسخ”.

اختتم حديثه: “كل واحد فينا له الجزء بتاعه، لو حد طلع عمل برنامج زي الأكيل، كله هيقول بيقلد مراد، لو حد طلع عمل برامج دايما مع الستات هيقولوا بيقلد رضوى، ولو حد عمل برامج ليها علاقة بالأسرة هيقولوا بيقلد شريف.. فنعمة وفضل أن كل واحد فينا عنده الجزئية بتاعته”.