"دعا لي نص ساعة".. نادية عمارة تروي تفاصيل مقابلتها للشعراوي

تحدثت الدكتورة نادية عمارة، عن تفاصيل مقابلتها للشيخ محمد متولي الشعراوي عندما كانت طالبة، موضحة أنها كانت تحلم بمقابلته وأن تتعلم على يده.

أضافت “عمارة” خلال لقائها في برنامج “قلبك بيروح فين” مع الإعلامية دعاء فاروق المذاع عبر إذاعة “راديو مصر”: “أنا سمعت أن الشيخ الشعراوي موجود بيصور في مسجد في السلطان حسين، وأنا من ساعة ما عرفت قلت لأبويا لازم أروح أشوف الشيخ، أنا كنت شوفته في 3 رؤى وكنت عايزة أحكيله، وكان في شيء جوايا بشدة بيقولي لازم أروح أشوف الشيخ، والدي كان مستغرب من إصراري وإلحاحي، ورحنا وصلت لأحد المساعدين قلت له لا بد إني أقابل الشيخ قالي طيب وقالنا الميعاد والساعة”.

أشار: “أنا كنت طايرة لا عارفة أنام ولا أكل، ووالدي كان عارف أن طموحي في حاجات تبدو أنها بسيطة.. استعدينا عشان نروح العربية عطلت والشيخ سافر وقعدت أعيط، العربية أشتغلت ورحنا المساعد بتاعه قال هيجي الأسبوع الجاي، وفعلا قابلته أول ما دخلنا عليه لقيته بيقول خيرا بشدة كده فأنا زعلت في نفسي، ولقيت الأسلوب شوية في شدة لأن في كم من الناس غير طبيعي وصدره مضايقه والأدوية اللي بياخدها، فقولت له يا مولانا أنا شوفتك في 3 رؤى لو حضرتك فاضي أحكيها لو حضرتك مش فاضي إحنا نمشي ونيجي وقت تاني”.

تابعت: “قالي لا هسمعهم تعالي أقعدي هنا، حكيت له غمض اللي حوليه افتكروا أنه نام، أنا محستش أنه نام أنا حسيت أنه في عالم آخر، هو فضل قاعد فترة كده وبعدين فتح عينيه وبص لي وقالي أنتي عايزة تشتغلي إيه قلت له أنا متخصصة في اللغة العربية شعبة درسات إسلامية وعايزة أكمل دكتوراه في التفسير القرآني ونفسي أخد الماجستير والدكتوراه في تفسير فضيلتك”.

أردفت: “قالي ربنا يوفقك ويفتح لك مسك إيدي من الكم بتاعي ورفعها وفضل يدعي لي نص ساعة لدرجة أن إيدي وجعتني، بس هو راجل بركة كبيرة، هو مسمعنيش الدعاء كان بيدعوا وهو مغمض، وقالي أنا باجي هنا يومين في الأسبوع تحبي نبتدي بإيه في الكتب اللي أنتي عايزة تقريها، ده كان في نفسي معرفش إني عايزة اتتلمذ على يده، أنا مقولتلوش ولا يعرف ليه أنا عايزه اقابله، وبدأنا هي كانت فترة بسيطة عامين قبل وفاته، وكنت أشعر أن الشيخ خلاص”َ.