رضوى الشربيني: الوجع ساعات بيبقى مفيد

هدير عبد الوهاب                                    رضوى الشربيني

ردت الإعلامية رضوى الشربيني، على سؤال من إحدى متابعيها تقول فيه: “كنت بحب واحد وسابني وراح خطب بسبب أمه وأنا مش عارفة أعمل إيه؟”

قالت “الشربيني” خلال حلقة مساء الجمعة من برنامج “هي وبس” المُذاع عبر شاشة “cbc سفرة”: “أنتي بتوجديله مبررات؟ هو أه ابن أمه.. لكن طالما هو عرف يسمع كلام أمه ويخطب واحدة تانية يبقى أنتي أصلا اللي مكنتيش فارقة معاه”.

نرشح لك: تامر أمين: برغم الخلاف بيننا.. رحيل وائل الإبراشي وجعني

تابعت: “الموضوع مش أمه لأن لو هي حيزبونة ومش عايزاكي كان حارب علشانك.. ده مخاطبكيش بس ده راح خطب واحدة تانية فلو الموضوع مش جاي على مزاجه مكنش عمل كدة”.

تابعت: “مفيش واحدة عرفت تبقى قوية إلا ومرت بظروف ضعيفة.. مفيش واحدة عرفت تقف على رجليها إلا لما حد خدها مقص حرامية 600 مرة، الوجع ساعات بيبقى مفيد.. خليكي ماشية بمبدأ “أنا لا أخسر أنا أتعلم فقط”.. ماتوجدوش مبررات لبني آدمين بيسيبوكوا.. مفيش راجل بيعرف يسيب ست بيحبها بجد”.

على صعيد آخر، كانت الإعلامية رضوى الشربيني، قد قالت إنها تستعد لإطلاق ماركة خاصة بها تحمل اسمها، لافتة إلى أنها سوف تعلن عنها في الوقت المناسب.

قالت “الشربيني” خلال لقائها في قناة “النهار العربي“: “في براند معين بشتغل عليه دلوقتي عشان يبقى باسمي.. بس مابحبش اتكلم في الحاجات قبل ماتتعمل.. بس بشتغل على حاجة أنا كنت عايزة اعملها”.

كما أنها وجهت رسالة لدعم البنات، قائلة: “خليكي أنتي.. مش محتاجة خالص تتغيري عشان ترضي أو تبسطي حد.. ممكن تتغيري علشان نفسك.. اشتغلي على نفسك مش عيب.. عدي أخطائك وشوفي مميزاتك وحبيها.. وخليكي عندك قناعة إن مفيش حد هيقدر يعملك حاجة إلا بإذن الله تعالى”.

ووجهت رسالة أيضا للرجل، حيث قالت: “بقول للرجالة اتقوا ربنا في نفسكوا.. واتقوا ربنا في بنات الناس”، مضيفة: “أنا مفيش راجل يقدر يوقعني.. والوقوع ده بيبقى باختيار الإنسان.. وزي ما ساب نفسه يقع يقدر يقرر يقوم من أول وجديد”.

رضوى الشربيني