"ماتقتلوش إبداعنا".. تامر فرج ينتقد وضع الممثلين في قوالب

شدوى ممدوح تامر فرج

انتقد الفنان تامر فرج، من يضعون بعض الممثلين في قوالب لتجسيد أدوار معينة بناءاً على شكلهم، لافتا: “مفيش ممثل ابن ناس، الممثل ابن الشخصية اللى بيؤديها“.

قام “فرج“ بكتابة منشور على صفحته الرسمية على موقع “فيسبوك“، وكتب: “هام جدا.. إلى السادة القائمين على صناعة السينما والدراما اللي في الصورة الأولى هو نفس اللي في الصورة التانية، ممثل اسمه تامر فرج، وممثل يعني يعرف يعمل كل الأدوار، مفيش حاجه اسمها شكله ابن ناس، مفيش ممثل ابن ناس الممثل ابن الشخصية اللي بيؤديها“.

نرشح لك: تامر فرج يكشف عن ممارسته للفنون القتالية

أضاف: “مفيش حاجه اسمها ده عينيه خضرا يبقى جان ولا بتاع ستات، في حاجة اسمها عدسات لاصقة زى ما ممكن تلاحظوا فى الصورة الأولى مش لازم نبقى كلنا بعضلات وشبه بعض ونقعد ننشر صورنا في الجيم عشان نشتغل أكشن، مش لازم استنى إني أوصل لنجومية أحمد زكي عشان أغير الصور النمطية اللي في دماغكم كفاية بقى القوالب الجاهزة اللي بتضعونا فيها كفاية استسهال“.

أردف: “في حاجة اسمها عين مخرج يعرف يطلع الإمكانيات اللي جوه الممثل.. أرجوكم كفاية قولبة
عارجوكم ماتقتلوش إبداعنا وخلونا نخرج الموهبة اللي ربنا أعطاها لينا.. اللهم هل بلغت … اللهم فاشهد“.

يذكر أن آخر أعمال الفنان تامر فرج، هو مسلسل”وجوه”، حيث شارك في الحدوتة الأولى والتي كانت بعنوان”وش تالت”.

ويشارك في بطولة “وش تالت” حنان مطاوع ومحمود عبد المغنى وهالة فاخر وعابد عناني ونورهان ورانيا ملاح، وإخراج معتز حسام، وتأليف محمد على ابراهيم.