شريف حافظ: ممكن أغني راب مع الوقت
قال الفنان شريف حافظ، إنه قام بتحضير الماجستير في إعادة تدوير المخلفات للحصول على الطاقة، مضيفا: “الكهربا كانت محتاجة حل وقت مشكلتها وكان موضوع تحويل المخلفات لطاقة حاجة ضرورية للبلد“.
أضاف “حافظ“ خلال لقائه مع برنامج “أسألني“، المذاع عبر قناة “cbc“: “أقوى دور عاملي شهرة بين الناس هو مسلسل (ليالي أوجيني)، وبعده مسلسل (خيانة عهد)“، لافتا إلى أنه يحب محافظة الإسكندرية جدا، مردفا: “مش فاكر أول أوديشن في حياتي لأني بعمل من 2012، وأول مرة دارت الكاميرا ومثلت كان في مشهد واحد بس قدام كاميرا أستاذ محمد شاكر خضير في مسلسل (لا تطفئ الشمس)“.
نرشح لك: شاهد.. كليب أغنية “حياتنا” لـ تامر حسني
تابع: “أخدت ورشة تمثل أونلاين وورشة في النقابة وفادوني في تغيير أسلوب التمثيل والمناهج“، وعن عدم عرض فيلم “100 دقيقة“ حتى الآن، قال: “معرفش.. يمكن المنتج مستني يبيعه بيعة حلوة“، مضيفا: “ماظنش عندي وقت للإخراج بس أنا بكتب روايات وممكن أغني راب مع الوقت، أنا مليش قرايب في الوسط الفني بس عندي أساتذة قريبين من العيلة أوي“.
أردف: “مش لازم أولاد الممثلين يمثلوا.. أنا عندي نظرية الله أعلم هي صح ولا لا هي أن ابن الممثل بيبقى نادرا حظه يكون زي باباه أو قريبه اللي في العيلة، لأن العيلة تقريبا بتدي واحد بس، نادرا ما بتدي اتنين بس بتحصل زي السعدني ومحمد إمام“.
أكمل: “الموهبة والشكل هم اللي بيفتحوا باب النجومية من أول طلة، وأكتر حاجة بحبها في شكلي أنه مصري رغم أنه في شوية ألوان بس ما ينفعش يتقال عليه غير أنه مصري.. ممكن أعمل دور بلطجي بملامحي، ولو في راجل عنده حاجة مش حاببها في شكله ممكن يعمل عملية تجميل بس أنا كشريف مقتنع بأن كل خدش لازم أسيبه لأنه بيضيف كاريزما“.
استطرد: “ممكن أعمل السيرة الذاتية للإسكندر الأكبر، وأحب أن أول بطولة ليا تكون أكشن، وأكتر حد بسطني بكلامه هو الأستاذ محمد سلامة لما كتب على الفيسبوك أنه مؤمن جدا بيا واللي حصل من شتايم الجمهور دليل على إني عرفت أعمل دور (عمرو أبو الهنا) كويس“، مضيفا: “أهم ما يميز إنچي المقدم كممثلة إنها ممتازة جدا في الأدوار الدرامية العميقة“.
تابع: “مش بفكر في اسمي يتحط فين على التتر لأنه مش هيفرق اللي بفكر فيه أن الدور يكون حلو أو صعب وإزاي أقدم فيه حاجة جديدة، هستفيد إيه وأنا عامل الدور وحش واسمي محطوط أول واحد؟“، وعن رأيه في فرض زي معين على النجوم في المهرجانات، قال: “أنا مش بحب حد يقولي أعمل إيه ولا أنا أقول لحد يعمل إيه”.
أضاف: “أنا ضد أن الفنان ينشر تفاصيله الشخصية على السوشيال ميديا لأن ده ممكن يكون بيأثر على الجمهور بطريقة سلبية هو مش عايزها.. في مواهب ممكن تطلع من التيك التوك بس أنا ضد السوشيال ميديا أساسا ولازم الناس تحطها على جمب عشان يشوفوا شغلهم كويس“.