شريف إكرامي: هوية المجتمع بتتغير سنة سنة!

انتقد شريف إكرامي حارس مرمى نادي بيراميدز، التأثيرات السلبية للسوشيال ميديا وضررها على الجيل الجديد من الأبناء، ووجه عدة نصائح للآباء للتعامل مع أبنائهم في تلك الظروف التي جعلت الفطرة والدين والحرام يُطلق عليهم “موضة قديمة”، على حد وصفه.

كتب “إكرامي” عبر حسابه على موقع التدوينات القصيرة “تويتر“: “بص يا سيدي، بدايتها كان تواصل وتسلية، انتشرت ودخلت كل بيت فبقت بيزنس، واحدة واحدة سيطرت على النفوس فبقت محور الحياة. لقينا علاقات انتهت، أر اتفككت ونفسيات ادمرت. صراعات وضغوطات وأمراض نفسية زادت، عيوب وعُقد ومعادن رخيصه بانت. الرضا قل والقناعة اختفت والإنسانيات انهارت”.

نرشح لك: شروط الأهلي للاستمرار في كأس مصر والسوبر

 

تابع: “القيم والمبادئ والعيب والحرام بقوا موضة قديمة.. ڤيروس هيدمر فطرتنا بعد ما يجيب أخلاقنا وثقافتنا الأرض. دوامة إدمان غرقانين فيها بمزاجنا ومبسوطين وفاكرين أننا مسيطرين، كلام مش جديد عارفينه وحسينه ومكبرين دماغنا وكمان دمه تقيل”.

أضاف: “تمام.. لو قريت اللي فات كله ومستني حل فأنا زيك معنديش بس عندي حاجه أخطر.. حد شايف إن قدام عنينا جيل بريء بيتم برمجته بالتدريج؟ حد شايف تأثير دوامة الإدمان اللي إحنا فيها على ولادنا؟ بيتزرع فيهم ايه؟ يقبلوا ايه ويرفضو ايه؟ حاسين بهوية المجتمع اللي بتتغير سِنه سِنة وتأثيرها عليهم؟”.

 

 

استكمل: “طب عايز إيه يعني؟ مش عايز حاجة غير إننا نلحق ولادنا وبناتنا، نلحقهم قبل ما يتخطفوا، قبل ما يتوهوا ونتوه معاهم، نحميهم ونفهمهم ونتعلم معاهم، نحاول ونتعب النهارده بدل ما نعيط ونندم بكره، نندم لو كبروا من غير فطرة نضيفة ومبادئ، من غير هوية ولا إنسانية ولا دين، من غير روح”.

 

اختتم تعليقه: “يبقوا ولادنا في البطاقه بس، حتى لو فشلت حاول تاني وتالت عشان على الأقل تبقى عملت اللي عليك.. الحياة بكل اللي فيها لا تستحق الكفاح، بس ولادنا يستحقوا.. إحنا مسئولين قدام ربنا عن الفعل، عن المحاولة، مش على النتيجة. معلش كلمتين فضفضة ملهومش لازمة من أب.. ماتاخدش فبالك”.

شريف إكرامي

تويتر حارس مرمى نادي بيراميدز رئيسية شريف إكرامي نيوز ليتر