عمرو أديب عن رحيل موسيماني: ضغوط الأهلي لا تطاق

علق الإعلامي عمرو أديب على خبر رحيل بيتسو موسيماني، المدير الفني السابق لفريق كرة القدم بالنادي الأهلي، صباح الاثنين، وقال إن موسيماني لديه عرض آخر.

أوضح “أديب” خلال برنامج “الحكاية” المذاع على شاشة MBC مصر، مساء الاثنين: “أنا كنت من الناس اللي شايفين إن إحنا يجب أن نبقي على موسيماني، موسيماني كان زي الفل خصوصا في أيامه الأخيرة”.

نرشح لك: بعد رحيله عن الأهلي.. رسالة موسيماني لـ “بيبو” والجمهور

 

تابع: “بس أنا عايز أقول لحضراتكم حاجة ترقى إلى المعلومة يعني، إن موسيماني لغاية النهاردة الفجر مكنش مدي كلمة إنه ماشي من الأهلي، موسيماني قعد امبارح مع قيادات في الأهلي وهو معه عرض آخر والأيام هتعدي وهنشوف العرض الآخر، وهو ده من حقه على فكرة، وبالمناسبة أنا هقول حاجة هتزعل الأهلي، الأهلي اللي طفش موسيماني، ليه؟ لأن ضغوط إدارة وجمهور الأهلي لا تطاق”.

استكمل: “يعني الراجل عملهم اللالي ومحدش كان مبسوط، يعني هنا وصلوا لمرحلة إنهم قالوله امبارح بالليل إحنا هنعمل القايمة واللاعيبة تقعد بس تبقى تنقي اللاعيبة اللي تلعب، وهو كمان نوّر أوي لأنه كان بيدرب الأهلي، أهلي أفريقيا النادي العالمي، فالراجل سعره لو كان بياخد في الأهلي إكس فهو في مكان آخر هو رايحه هو واخد إكس في 2 أو 3”.

واصل: “فالضغط بتاع فكرة نادي البطولات ونادي القرن والكيان وجمهور الأهلي على الراجل.. طيب هو عليه من ده بأيه؟ أنت بتديني كام؟ في حد جه قالي أنا هديك كذا والراجل مشي بالفريق المعاون كله”.

كان النادي الأهلي، قد أعلن عن رحيل موسيماني عن تدريب الفريق، اليوم الاثنين، وذلك بفسخ التعاقد بالتراضي بين الطرفين، وذلك بعد رحلة استمرت على مدار عام و8 أشهر، حصد الفريق خلالها 5 بطولات، هم الدوري المصري وكأس مصر وبطولتين دوري أبطال أفريقيا وبطولتين السوبر الأفريقي، بالإضافة إلى برونزية كأس العالم للأندية مرتين.