رحمة حسن تكشف تفاصيل تعرضها لإصابة قوية بسبب "عضة كلب"
كشفت الفنانة رحمة حسن، عن تعرضها لإصابة قوية بسبب “عضة” كلب، تلقت على إثرها العلاج في مستشفى إمبابة.
كتبت عبر حسابها على موقع تبادل الصور والفيديوهات “إنستجرام”: “إمبارح الساعة 11 بليل كنت نازلة أجيب حاجة من السوبر ماركت جمب البيت، وكنت ماشية على الرصيف وكان في عربية بتركن جمبي عادي، فجأة الباب اتفتح ولقيت كلب (جيرمن شيبرد) تقريبا مَش متاكدة أوي، بيهجم عليا بكل قوته، طبعا حاولت أجري لكن للأسف الكلب كان قوي وشرس ووقعني علي الأرض”.
تابعت: “حاولت أقوم وأجري وصاحبته حاولت تشده، بس فك الليش بتاعه وعضني عضة كبيرة وغويطة بنابه في منطقه حساسة. صاحبة الكلب كتر خيرها أخذتني فورا علي مستشفى إمبابة، أدوني حقنة تطعيم الكلب ولسه فاضلي 4 هاخدهم خلال شهر، بس المشكلة أن من إمبارح الجرح بينزف دم كتير، وأنا طبعا خايفة ومصدومة”.
أضافت: “وتعبانة وعندي تروما من إمبارح، واللي واجعني أكتر إني مَش عارفة أتصرف ازاي.. خصوصا إني أكيد مَش عايزة الكلب يتأذي، بس كمان مَش عايزة أي إنسان كمان يتأذي ويتعض ويتبهدل في الشارع زيي.. أنا كنت بشوف الكلب ده دائما مع صاحبته بتمشي بيه في الشارع جمب البيت عندي، وعشان شكله شرس كنت بامشي بعيد عنه لما بشوفه، إمبارح صاحبة الكلب قالتلي متخافيش هو عض ولادي قبل كدا وتمام محصلش حاجه! طبعا أنا أتصدمت لما عرفت أنها مَش أول مرة الكلب يعض حد ومع ذلك هي سايباه عادي في الشارع من غير كمامة أو حد قوي يمسكه”.
اختتمت: “بجد حرام عليكم، الكلب لما بيكون حجمه كبير وشرس بيعتبر سلاح، وصاحبه مسؤل مسؤلية كاملة عنه ويحاسب على إهمال مسؤليته، خصوصا لو إهماله تسبب لشخص تاني في أذى بدني يحتاج أكتر من 21 يوم علاج وأذى نفسي ماعرفش هايحتاج قد إيه عشان يخف. أنا كنت بحب أنزل أحط أكل ومايه للكلاب والقطط تحت البيت، دلوقتي أنا حقيقي مرعوبة أقرب منهم وخايفه جدا. أنا أسفة طولت عليكم بس أنا بجد مَش عارفة المفروض أعمل إيه عشان محدش تاني يتأذي”.
View this post on Instagram
يذكر أن الفنانة رحمة حسن شاركت في رمضان الماضي بمسلسل “ملف سري”، من بطولة هاني سلامة وعائشة بن أحمد وماجد المصري ومحمد محمود عبد العزيز ومحسن محيي الدين، تأليف محمود حجاج وإخراج حسن البلاسي.