أمير كرارة: معنديش مانع بناتي يدخلوا التمثيل وهساعدهم

أكد النجم أمير كرارة، عدم معارضته فكرة خوض بناته تجربة التمثيل، موضحًا أن علاقته بشقيقه أحمد قوية، وأنه لا يقف أمام مسيرته الفنية.

أشار “كرارة”، خلال حواره ببرنامج “حبر سري” مع الاعلامية أسما إبراهيم، على قناة “القاهرة والناس”، إلى أنه لم يقف طوال مسيرته الفنية ضد فنان أو ضد رزق أحد، متابعا: “عمري ما في حياتي ما وقفت فى رزق حد ولا أكل عيش حد”.

نرشح لك: أمير كرارة: “كنت بطلع أسقف وسط الجمهور بـ50 جنيه في البرامج”

وعن فكرة دخول بناته مجال التمثيل قال “كرارة”: “معنديش مشكلة خالص يمثلوا وهساعدهم يشقوا طريقهم وهكون في ضهرهم، ولو فعلا بقوا ممثلين كويسين يبقى تمام ويمشوا فيه لوحدهم ويكونوا موهوبين ويشتغلوا على نفسهم وينموا الموهبة”.

 

أوضح أن علاقته قوية بشقيقه أحمد وأنه لا يقف أمام مسيرته الفنية، لافتا: “اللي بعمله جدعنة مع أخويا، وهو عارف كده كويس، وأنا وهو قريبين قوي من بعض، وهو شغال كويس وجاله مسلسلات كتير وأتمنى أن أخويا يبقى أحسن مني مليون مرة”.

تابع: “أحمد علاقتي به قوية، وهو أخويا الكبير وحبيب قلبي وفي شغل تاني لنا مع بعض وهو المسئول عنها مش أنا، ولكن في حته التمثيل هو مقتنع أننا منشتغلش مع بعض، وعمره ما طلب مني كده، وهو راجل فاهم أننا منطلعش مع بعض عشان محدش يقول بيأخذ أخوه معه في كل حاجة”.

كما أكد “كرارة”، أن فراق والده ووالدته أمر صعب عليه للغاية، وتغيرت شكل الحياة بالنسبة له بعد رحيلهما، موضحًا: “فراق أبويا صعب قوي والحياة مع أبويا كانت حاجة تانية خالص وغير، وموت والدي وأمي صعب بس موت والدي كان شديد قوي وصدمة كبيرة قوي وكسرت ضهر قوي”.

أما عن أزمته مع الفنانة مها أحمد رد قائلا: “أنا مرفضش تمثل أدوار معايا، ولكن المخرج بيبقى له رؤية وشركة الإنتاج بيكون لها حسبة معينة، ولكن مها أحمد أحبها جدا، وأنا مش زعلان منها، وكلمت مجدي كامل بعد كده أوضح له أني متدخلتش في شغل لها”.