النص الكامل لتصريحات إبراهيم عيسى المثيرة للجدل ببرنامج "حديث القاهرة"
جدل كبير أثير في الساعات القليلة الماضية، عقب إدلاء الإعلامي إبراهيم عيسى، بتصريحات حول الإسراء والمعراج، والتي ترتب عليها إصدار النائب العام أمر بالتحقيق فيها.
وفيما يلي يستعرض “إعلام دوت كوم“، النص الكامل لـ تصريحات إبراهيم عيسى:
نرشح لك: النائب العام يأمر بالتحقيق مع إبراهيم عيسى
– الشيوخ مخبيين 90% من الدين فيما يخص كل شيء.
– الشيوخ تجار ووكلاء دين وفاكرين نفسهم وسطاء لله وبيقدموا لكم دين بتاعهم هما.
– المسلم الحالي في 2022 مش محتاج رجل دين أو شيخ في حياته.. هيعلمك إيه الشيخ؟! الصلاة والصوم والزكاة؟! هو أنت مش عارف الصلاة والصوم والزكاة؟! هل الشيخ هيعلمك إنك تكون محترم مع الناس ولا تتجسس ولا تتلصص؟ لأ ده الشيخ بيعلمك تتجسس وتتلصص وتتدخل في الحياة الخاصة للناس.. الشيخ دلوقت يطلع ع اليوتيوب وشغال مفتش قلوب.
– 99% من القصص اللي بيحكيها الشيوخ كاذبة ووهمية لأن بيقولك نص الحقيقة.. يعني بيقولك عن عمر بن الخطاب “حكمت فعدلت فأمنت فنمت يا عمر” وفرحان أوي بعدالة سيدنا عمر وقاعد يحكيلك القصة دي.. هل حكالك إن عمر اتقتل بعدها؟ يبقى عدل فأمن فنام ازاي.. هل عرفت إن الراجل اللي قال الكلمتين دول لعمر هو المتهم الأول في قتله؟ الشيخ قالك الكلام ده؟! هو حكالك القصة الأولانية عشان يقولك شفت العدالة بتعمل إيه.. العدالة بتعمل إيه ما عمر اتقتل أهو وهو بيصلي في الجامع.. القصص كلها أنصاص قصص فمش حقيقية.
– هل الشيخ قالك إن ابن سيدنا عمر خرج بعد أبوه ما اتقتل وقتل الرجل المتهم بالقتل وبنته وابنه بدون حساب أو قصاص وبدون أي حاجة خالص! وإن كان مفروض يتفرض عليه القصاص ويتقتل فعثمان بن عفان عفى عنه ومنفذش فيه القصاص وقالك أصل دول غُرب مش عرب فالدية بتاعتهم عندي أنا وأنا ولي دمهم فهدفع فلوسهم بكرمه ورقته الشهيرة.
– كل الحكايات اللي بتجيلك حكايات دعائية مش التاريخ الحقيقي.. الشيخ هيحكيلك قصص وهمية.. لما يجي يقولك على الإسراء والمعراج.. طب إيه رأيك إن مفيش معراج.. هتصدق إن مفيش معراج.. كل قصة إنه طلع السما وشاف الناس اللي بتصلي والناس اللي في النار ووو.. كل دي قصة وهمية كاملة، ده كتب السيرة والتاريخ والحديث اللي بتقول ده.. بس هو مصدرلك الكتب اللي بتقول إنها حصلت.