منة فضالي: نويت تبني طفل وتوفي قبل انتهاء الإجراءات
عبرت الفنانة منة فضالي عن حزنها بسبب رغبتها في تبني أحد الأطفال وفشلها في الأمر، وذلك بعدما حكت قصته المؤثرة عن إلقاء أم لطفلها في إحدى المستشفيات.
كتبت عبر موقع التواصل الاجتماعي “فيس بوك“: “الولد ده اتولد من 5 أيام أمه خلفته في مستشفى في الفيوم وقالتلهم أنا مش عاوزاه ارموه في الشارع.. الممرضة صعب عليها خدته تربيه، جوزها قالها تبقي طالق مني لو الولد ده فضل في البيت راحت مرجعاه المستشفى تاني.. واحدة تانية بتشتغل معايا في البيت أختها اخدته تربيه سافرت الفيوم واخذت الولد وودتو لدكتور طلع عنده الصفره بتقولي النهارده قولتلها هاتيه انا حتبناه لأني نفسي يبقى عندي طفل”.
نرشح لك: عايدة رياض: لو عندي أولاد كنت فضلتهم على الفن
تابعت: “من شوية بتكلم أختها قالتلها الولد مات بعد ما ابتديت أخد إجرءات التبني مش قادرة أوصفلكم حالتي حقيقي ولا أوصف كرهي للست اللي خلفت حتة لحمة ورمتها وراحت تشوف نفسها، جالها قلب ازاي ترمي ضناها مهما كانت ظروفها ابنها ضناها ازاي في أمهات بـ القذارة دي بس يعلم ربنا إني كنت حخليه أحسن حد في الدنيا مش الأم اللي بتخلف الأم اللي بتربي”.
اختتمت: “أنا بكتب البوست ده لأني فعلا موجوعة من قلبي وكنت فرحانة إني حاخد الولد بس ربنا مش رايد.. ربنا يرحمك برحمته وحسبي الله ونعمة الوكيل في الست دي ربنا ينتقم منها أشد انتقام .. إحنا الحيوان بيصعب علينا مابالكم طفل ملوش أي ذنب غير أن واحدة معندهاش قلب ولا ضمير ترمي ابنها”.
