وزير التعليم: نحتاج 100 مليار لحل مشكلة كثافة الطلاب في الفصول
نورهان عبد الرحمن
تحدث دكتور طارق شوقي، وزير التربية والتعليم والتعليم الفني، حول كثافة الطلاب في الفصول ومتوسط عددهم في كل فصل.
قال “شوقي” في مداخلة تليفونية بحلقة أمس الاثنين، ببرنامج “الحكاية” المذاع على شاشة “MBC مصر” مع الإعلامي “عمرو أديب”، إن موضوع الكثافة تم تناوله مسبقاً، وأن الرئيس عبد الفتاح السيسي تحدث في الزيادة المضطربة في عدد السكان، مضيفا: “واللي بتسابقنا طول الوقت”.
نرشح لك: وزير التعليم: 50% من الطلاب معفيين من المصروفات الدراسية
وأضاف: “إحنا بنبني كل سنة حوالي 15 ألف فصل ومن غير ما بنقول حاجة، بنبني هذا العدد كل سنة وبنعمل فصول ذكية، لكن يظل عدد الطلاب أكثر من الأماكن المتاحة لأنه لو عاوزين ننهي موضوع الكثافة فإحنا محتاجين فوق الـ 100 مليار إحنا بنشتغل بحوالي من 12 لـ 14 مليار سنويا وده رقم مش قليل”.
أوضح: “بس طبعاً أقل من المطلوب، وعشان كده الزيادة كل سنة بيتضاف للمنظومة حوالي 700 ألف طفل على العدد اللي قبله، لما بدأت شغل في الوزارة كان عام 2017 وكان عندنا 21 مليون إنهاردة عندنا فوق الـ 24 مليون”.
استكمل: “إحنا فى 3 سنين في ناس بتدخل وناس بتخرج بس اللي بتدخل أكثر وده من انعكاسات الزيادة السكانية اللي الدولة بتتكلم عليها طول الوقت بتأثر في التعليم بتأثر في الصحة، في كل حاجة، فكلنا بنسابق الزيادة السكانية”.
أردف: “لو حسبنا متوسط عدد الطلبة في الفصل هنلاقيه في حدود 35 طالب، هو مش وحش أوي ومش حلو أوي، إنما المشكلة إن التوزيع بقى مش نظامي يعني في أماكن محافظات بعينها فيها العدد ده بيزيد أوي بشكل لا يمكن قبوله وفي محافظات أحسن كتير يعني محافظات الصعيد أحسن من الدلتا مثلاً”.
مشيراً إلى أن في المستوى الأوائل وفي المسابقات، الطلاب في الجنوب أكثر التزاماً بكثير، مضيفا: “أن كثافة الطلبة بتختلف من مكان لمكان ومن حي لحي ومن محافظة لمحافظة فعلى المتوسط هتلاقي العدد ده ما بين الـ 35 والـ37، كان نفسنا العدد ده مايزدش عن 25 يبقى في 2ونص متر بين كل طالب والتاني ده من غير كورونا الوضع الطبيعي ونسبة المعلمين لعدد الطلبة، إنما المشكلة دى متواصلة بقالها سنين كتير بقالنا 7 سنين دلوقتي بنحل فيها بنينا عدد هائل من الفصول ولا زال أمامنا عمل كبير في الاتجاه ده”.