شاشة

أشرف زكي: حلا شيحة “مشطوبة” من النقابة

قال الفنان أشرف زكي، نقيب المهن السينمائية، إنه انزعج من تصريحات حلا شيحة الأخيرة ولم يصدقها. مردفا: “لكن دا درس لينا للناس اللي بتعلن إن الفن حرام وبعدين ترجع”.

تابع “زكي” خلال اتصال هاتفي مع الإعلامي عمرو أديب، مساء الجمعة في برنامج “الحكاية“، عبر شاشة “mbc مصر”: “لا عودة للناس دي تاني ولا مكان لهم بالنقابة، ودا قرار نهائي، وهي لا مكان لها في النقابة مرة أخرى، وإحنا غلطنا لما قبلنا عودتها”.

نرشح لك: عمرو أديب عن موقف حلا شيحة: مش مريحني بيدخلنا في دوائر مظلمة

أشار أشرف زكي إلى أنه يعتذر عن قبول عودتها للنقابة، مضيفا: “اللي شايف الفن حرام يتفضل يكمل لوحده”، وفي سياق متصل، قال: “هي أساسا مش موجودة في النقابة، لما كانت مشيت كانت اتشطبت من النقابة وكنا في إجراءات عودتها بتصريح لكن لا مكان لها الآن في النقابة”.

لفت إلى أنه لم يبلغها بذلك ولن يفعل، مضيفا: “اللي شايفين الفن حرام يخليهم، لكم دينكم ولي دين”. مؤكدا على أن الفن مهنة عظيمة ولا تهون عليه ولا تستحق ما يفعله البعض.

أردف: “سألت الشيخ الشعراواي في مرة هل الفن حرام؟ وكان معايا الفنان حسن يوسف، فرد عليا وقالي: “فأما الزبد فيذهب جفاء، وأما ما ينفع الناس فيمكث في الأرض”، إحنا بنأدي رسالة وأنا هروح الفيلم وفخور إني هروحه”.

أضاف: “الأعمال المهمة زي الاختيار والممر ودعوة الفنانين لمؤتمر مبادرة حياة كريمة دا اعتراف بدور الفن، وتيجي واحدة مذبذبة تهد هذا الكيان العظيم! لا مصر عظيمة بفنها والناس دي لازم يروحوا يتعالجوا”.

كانت الفنانة حلا شيحة، هاجمت فيديو كليب “بحبك” الذي طرحه الفنان تامر حسني وتظهر فيه بمشاهد من فيلمهما الجديد “مش أنا” مؤكدة على أنها فوجئت بطرح الكليب رغم وعد تامر لها وتأكيده احترام رغبتها.

كتبت حلا عبر حسابها على انستجرام تقول “أنا اتفاجئت جدا ًبنزول كليب يجمع فيه مشاهد متفرقة من الفيلم و في ايام ذي الحجة ايام مباركة و خصوصاً بعد اخر بوست نزلته و وضحت فيه انا ايه ..و اتفاجئت اكتر خصوصا ًبعد وعد تامر حسني ليا وتأكيده انه حيحترم رغبتي و بعض الطلبات اللي طلبتها منه بكل احترام وود الصيف اللي فات و اكدلي انه حيحترم رغبتي ..احنا يمكن نجحنا بمقايس الدنيا بس صدقوني بمقايس ربنا احنا لم و لن ننجح، انا عارفة و متاكدة ان زملائي جواهم خير بس للاسف فتنة الشهرة و النجاح مش بتخلينا نشوف ونقيس الامور صح”.

أضافت “بتكلم من قلبي الكليب ده ميرضيش ربنا و انا عيطت لاني شفت نفسي في المشاهد دي .. دي كانت زلة نتيجة ظروف مريت بيها و كلنا بنغلط و لازم نغلط علشان احنا بشر بس المصيبة اننا بنغفل و بننسى ..انا مش حتكسف من حد انا تبت من المشاهد دي و هي لا تصح و انا غلطت و بصلح و اهم حاجة ان ربنا يرضى عني لان في الاخر ده اللي حينفعنا مش الشهرة و لا النجاح لا هو مش نجاح أصلا علشان النجاح الحقيقي حاجة تانية خالص احنا اغلبنا ناسينها الا القليلين منا”.

واستطردت “الفن لو بيخلينا نبعد عن منهج ربنا و منبقاش قدوة لولادنا يبقي باطل و ميبقاش فن، احنا كلنا عندنا امتحان في الدنيا دي و حابة افكرك بالفيديو ده يا تامر اللي قولت فيه انا مش بتمنى أموت وأنا مطرب انا دايما خايف من كده.. كلام أكيد قولته في لحظة صدق جواك و جوانا كلنا، شوفه تاني يمكن يفكرك ان جواك اكيد في صراع و انا و كلنا” ووضع مقطع لرابط حوار مع تامر حسني عبر شاشة قناة دريم.
وأضافت “كلنا بنغلط بس المهم في الاخر نتدارك الغلط و نصلح .{إِلَّا مَن تَابَ وَءَامَنَ وَعَمِلَ عَمَلࣰا صَـٰلِحࣰا فَأُو۟لَـٰۤىِٕكَ یُبَدِّلُ ٱللَّهُ سَیِّـَٔاتِهِمۡ حَسَنَـٰتࣲۗ وَكَانَ ٱللَّهُ غَفُورࣰا رَّحِیمࣰا}.. الله على كلام الله وجماله يا سلام لو أصواتنا ومواهبنا كلها نستعملها في الخير عشان يبقى فن بجد”. أشرف زكي

عيد الأضحى 2021

كاتب

إعلام دوت كوم صوت الميديا العربية

أنت تستخدم إضافة Adblock

برجاء دعمنا عن طريق تعطيل إضافة Adblock