بعد تبرؤها من كليب "بحبك".. راندا البحيري تهاجم حلا شيحة

راندا البحيري تهاجم حلا شيحة

علقت الفنانة راندا البحيري على تبرؤ الفنانة حلا شيحة من كليب “بحبك” من فيلم “مش أنا” مع الفنان تامر حسني، وهاجمت راندا حلا مدافعة عن تامر.

نشرت “البحيري” عبر حسابها الشخصي على موقع التواصل الاجتماعي فيسبوك، وكتبت: “هو برضو اللي مضطرب؟ لا والله كانت صعبانة علي في الأول بس كده صعب اوي حد ياخد بقى منها الموبايل بسرعة، هو محدش قال لحلا إن باب التوبة مش موجود على الإنستجرام؟”.

راندا البحيري تهاجم حلا شيحة

تابعت: “فتاتي، ازاي تكوني داعية بمنتهي السهولة وتنصحي زمايلك وتنتقديهم؟ في يوم وليلة عريس وطرحة اتنين متر وفرح بس بقى من تاني يوم حضرتك تقدري كده تبقي رئيسة مجلس إدارة العالم وتقولي مين هيدخل الجنة ومين لا، ده بتقولك إحنا بمقاييس ربنا لم و(لن) ننجح والعياذ بالله إن شاء الله أنت، بتقولك بمقاييس ربنا لم و(لن) ننجح، هو حد معلمها عربي كويس؟”.

 

نرشح لك: حلا شيحة: الفتنة والشهرة لا ترينا الأمور بشكل صحيح وبكيت من مشاهدي مع تامر حسني

 

أضافت: “هو محدش فهمها إن اللي بتعمله ده ممكن يعرضها للمسائلة القانونية وإنها بتضر بسمعة فيلم وبالتالي إيراداته؟ وبتتكلم عن ممثل ونجم بحجم تامر حسني بالشكل ده اكنها أحسن منه، وإحنا كلنا عارفين الخير اللي بيعمله تامر طول عمره في الخفا وفي العلن على أيدينا كلنا فضله على ناس كتير اوي وربنا جعله سبب لفتح بيوت قد كده، تقوم دي تنصحه؟ لا والله هم يضحك”.

من جانبه، علق الفنان تامر حسني على هجوم الفنانة حلا شيحة ضده، بسبب عرض مشاهد رومانسية تجمعها به في فيديو كليب “بحبك” من فيلم “مش أنا” المعروض حاليا بالسينمات.

نشر “حسني” عبر صفحته الرسمية على موقع التواصل الاجتماعي فيسبوك، وكتب: “نهاركم جميل يا أغلى الناس، الحقيقة عمري ما بتخيل إني ادخل في نقاش بالشكل دا مع زميل بحترمه وكان في بينا كل خير”.

تابع: “للتوضيح بما إنك يا حلا كتبتي بوست وأشركتي الجمهور الكريم معانا بدال ما كنتي تكلميني شخصياً ونتناقش بيني وبينك، فأنا مضطر أرد هنا برضو.

أولاً أنا عمري ما وعدتك إن الكليب مش هينزل دا محصلش أصلاً يا حلا مش أنا خالص اللي أوعد وأخلف، الحقيقة إني احترمت كلامي معاكي ووعدتك أشيل مشاهد تانية طلبتيها وشيلتها بالفعل وشكرتيني عليها ولو حابة تفتكري المشاهد اللي اتشالت بعد اذنك روحي شوفيها في المونتاچ عند الأستاذ عمرو عاكف أو كلميه يبعتهالك كلها موجودة”.

استكمل: “وبعدين الفيلم بقاله 3 أسابيع في السينمات والكليب موجود جوة الفيلم، هو بالنسبالك الحرام إننا ننزل الكليب على اليوتيوب بس! إنما الكليب يتشاف جوه السينمات عادي؟ منطق غريب فعلاً يا حلا، وبعدين هو مش أنتي اللي مضيتي عقد وتقاضيتي عليه مبلغ كبير عشان الدور دا بعينه! هو مش أنتي اللي صورتيه ومثلتيه بنفسك وبمنتهى الرضا ولاّ حد أجبرك؟! وللتوضيح للجمهور الكريم أنا والمخرجة الأستاذه سارة وفيق بعتنالك وكنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظه تقوليها، ماكنتيش بتردي علينا وتليفوناتك كلها كانت بتقفل في وشنا، إنتي للأسف يا حلا متعاملتيش صح مع الموقف كان لازم تهتمي بأمرك أكتر من كدا ولو كان ليكي أي طلب تاني كنت هعمله بكل حب إنما إنتي فجأه أختفيتي ومكملتيش تركيب صوتك في الفيلم ولا جيتي تتصوري عشان آفيش الفيلم أصلًا ومخليتيناش نعرف نعمل آفيش مجمع! وبقيتي تقفلي تليفوناتك وتكنسلي علينا كلنا”.

أردف: “وبعدين أي فيلم بيبقى ليه خطة مسبقة في الدعاية وأنتي عارفاها كويس ووافقتي عليها ودا كليب رومانسي يعني معقول كنتي عايزة المنتج يشيل كل مشاهدك اللي صورتيها من الكليب ويطلعني بغني وبقول الكلام الرومانسي دا للأستاذ ماجد الكدواني مثلاً هو دا يُعقل؟! أنا زعلان منك جداً يا حلا على مفردات البوست بتاعك الغير موفقة ومستحيل هرد بطريقتك اللي فيها تجريح واتهامات باطلة ليا احتراماً لحاجات كتير يمكن فايتاكي بس مش هتفوتني وعلى فكرة أنا واثق إنك عارفة إني مستاهلش منك كدا وهكتفي بالتوضيح دا وربنا يهدي الجميع و يكتبلك كل الخير اللهم آمين”.

يشار إلى أن فيلم “مش أنا” حقق إيرادات مرتفعة منذ طرحه بدور العرض، والفيلم بطولة تامر حسني، وسوسن بدر، وماجد الكدواني، وحلا شيحة، ومن إخراج سارة وفيق.