تعليق زوجة أحمد الفيشاوي على أزمة البوركيني
علقت ندى الكامل، زوجة الفنان أحمد الفيشاوي، على أزمة البوركيني التي أثير مؤخرًا، بعد منع إحدى الفتيات من النزول إلى حمام السباحة بسبب ارتدائه.
كتبت “الكامل” في المنشور الذي طرحته عبر حسابها الشخصي على موقع “فيس بوك” الآتي: “اللي زعلان من حكاية البوركيني دي والمايوه البكيني اعملوا أماكن للستات دي والبنات اللي بتلبس بوركيني ويتفصلوا واللي عاوز بقى يحتفظ ويطبق قوانينه في مكانه يطبقها ونخلص بقى من الحكاية الهبلة دي، انتوا بتتخانقوا عشان حتة قماش زيادة أو حتة أقل، وفي عز ما احنا بنتخانق أحب أقول إن الستات طلعت القمر وبيشتغلوا وبيحكموا بلاد كبيرة وانتوا لسة بتتخانقوا على مايوه، حاجة حزينة فعلا”.
نرشح لك: نيكول سابا عن منحها الإقامة الذهبية بالإمارات: لفتة جميلة وكرم
تابعت: “وأظن حكاية تخصيص أماكن لأي طرف متضرر دي حكاية سهلة وبعدين بصراحة أنا شوفت كتير وشوفت محجبات علي البيسين ومكنش يوم سعيد بالنسبة لي أبدا، خصوصا بعد ما لاقيت البيسين كله بيصورنا أنا وجوزي وساعات لوحدي كمان ومع ولادي، وأنا مش بعمم أنا بقول موقف وحصلي على وجه الخصوص وليس التعميم، لكن للأسف ده اللي بيحصل، ناس بيسيبوا كل حاجة ويمسكوا تليفوناتهم وبيصورونا وبيفضلوا يفصصوا فينا”.
أضافت: “وأنا مش بعمم، دي تجربة حقيقي حصلت لي، وبتحصل لأي حد موجود من الطرفين، دول بيبقوا مضايقين من دول والتانين زعلانين برضوا، اللي عاوزة تلبس تلبس واللي عاوزة تغطي تغطي، كلها في الآخر مية واللي لابسة البوركيني بتطلع المايوه لازق على جسمها ومفسر كل حاجة، واللي لابسه بكيني برضه مختلفتش عن التانية، فا نهدي بقى عشان دي حكاية سخيفة أوي”.
اختتمت: “وزي ما اللي لابسة بوركيني زعلانة انها ساعات بيمنعوا نزولها بتزعل، انا من الناس اللي مش بيلبسوا وبزعل برضه من إن الناس مش بتسبنا دقيقة من غير ما يبصوا ويعكننوا علينا فلوسنا ووقت إجازتنا اللي بنستناه، فا كلنا متضررين محدش بقي يزايد على حد ولا يزكي نفسه، عشان احنا كلنا جوه خلاط اسمه انتهاك الخصوصية وبنتفرم فيه كل يوم”.
زوجة أحمد الفيشاوي
