عمرو أديب: "محدش نصف نوال السعداوي وهي عايشة"

نعى الإعلامي عمرو أديب، الكاتبة الراحلة نوال السعداوي، التي توفت مساء الأحد، عن عمر ناهز الـ90 عاما.

قال “أديب” خلال تقديمه برنامج “الحكاية”، مساء الأحد، عبر شاشة “MBC مصر”: “عايز أقول كلمة حق نوال السعداوي لو كانت عايشة النهاردة كانت اتبسطت قوي، لأن فجأة أغلب الناس بيتكلموا بتقدير واحترام كبير لنوال السعداوي”.

نرشح لك: أثارت الجدل دائمًا.. مواقف في حياة نوال السعداوي

تابع: “هذه السيدة أغلب عمرها مكنش في تقدير ليها قوي، وكانت دائما محط هجوم المجتمع محدش نصف الست دي وهي عايشة، روح دور على عدد الحوارات ليها في مصر، أغلب الحوارات كانت برا مصر، محدش كان يستحمل جرأة وصراحة نوال السعداوي”.

أضاف: “الست دي قعدت هربانة من مصر 10 سنيين لأن كانت مهددة بالقتل، الست دي اتسجنت وقت الرئيس السادات، الست دي دفعت تمن رأيها وفضلت متمسكة بجرأتها وصراحتها ورأيها، مش هنخش في أرائها لأن لو اتكلمنا عن الأراء هتبتدي تنزعج كده شوية، إنما هي كانت متمسكة برأيها جريئة مبتخافش، ورأيي لو كانت شافت الكلام دا كانت هتكون سعيدة بهذه الاحتفالية اللي معمولة”.

واصل: “يا ريت والست دي عايشة حد خد بإيدها، حد خفف عنها الهموم كانت بتتهاجم هجوم غير طبيعي، أنا عملت معاهم 4 حوارات 2 صحافة و2 تلفزيون ومسلموش، لم تكن هذه السيدة الرأي العام، ويجب بقى إن إحنا نبص للمفكرين والكتاب أنهم مش موجودين عشان يطبطبوا علينا ويريحوا دماغنا، هما موجودين عشان يهزوا عقلنا عشان يخليك تفكر، هي مش موجودة عشان تقولك اللي مقتنع بيه”.

استكمل: “أنا رأيي إن 90% من اللي قالته نوال السعداوي لا يروق لناس كتير، مش بس لا يروق لكن مينفعش، عشان كده في ناس كتير بتكتب عنها النهارده طب كنتوا فين وهي عايشة مكنش حد كان يقدر يقف جمب نوال السعداوي، مش نوال اللي كانت هتبقى في خطر اللي دافع عن رأي لنوال السعداوي كان يبقى في خطر، مكنتش سهلة بصرف النظر عن كنت معاها أو لأ، نوال السعداوي كانت كاتبة خطرة”.

أشار إلى أنها كانت مهددة بالقتل، مضيفا: “عشان كده لازم نبتدي نتعلم مفيش زي دول كتير خلاص، الست عندها 90 سنة يعني 70 سنة ليها رأي، بصرف النظر معاها أو ضدها، لكن دلوقت آخرنا عناوين تعليق ناري وهكذا، دايما أدوا الأدباء والمفكرين فكرة يقولوا اللي مقتنع بيه مقتنع بيه والباقي أرميه”.