بعد رحلة 8 أشهر مع المرض.. لينا شاكر تعلن إصابتها بالسرطان

أعلنت الإعلامية لينا شاكر إصابتها بالسرطان، بعد رحلتها مع العلاج الكيماوي منذ 8 أشهر.
قالت “شاكر” خلال منشور نشرته عبر حسابها على موقع التواصل الاجتماعي “فيس بوك”: “بالصدفه حسيت إن في حتة بلية كده في جسمي وفورا روحت أشوف إيه دي ومن هنا ابتديت الرحلة، عملت الفحوصات والتحاليل واتشخصت وعملت العملية وأخدت الكيماوي وبعدها الإشعاعي”.

أضافت: “الحقيقة أني ماخدتش الخبر ده زي بقية الناس، لكن جالي لحظه انهيار وأنا بعمل المموجرام وماكنتش لسه اتشخصت بس لأني كنت بدعي ربنا أنه ياخذني وأنا على رجلي وفي صحتي وكنت متصورة أنه هيكتبهالي بس في اللحظة دي زعلت لأني ابتديت أحس أنا داخلة علي إيه، أنا كنت بقول أكيد هيجيلي كانسر زي ماما بس ما تخيلتش أنه يكون بدري كده وأنا عندي 43 سنة وعرفت بنفسي الإحساس ودوقت جلسات الكيماوي والإشعاعي كمان”.

نرشح لك: “اليوم السابع” تعتذر وتحذف فيديو نهلة سلامة

أردفت: “كله هيعدي إن شاء الله والمهم إن أي حد عنده المعركة دي يحاول يرفع من روحه المعنوية، أنا في الأول حبيت إن الموضوع ما يتعرفش وما قولتش لناس كتير من صحابي وأهلي عشان ماكنتش عايزة حد يزعل أو يقلق أو حتى يشيل هم الخبر ده أو يبصلي بنظرة حزن”.

استكملت: “بعد الـ8 شهور اللي فاتوا خلاص دلوقتي أنا جاهزة أني أقول للدنيا كلها مش عشان مستنية حاجة، بس عشان حاجة واحدة.. وهي أني أكون مصدر قوة أو إلهام وإني أقول لكل الناس إن دي مش نهاية الدنيا وإن عادي ده مرض زي أي مرض”.

تابعت: “هنا لازم أشكر كل اللي ساندوني من أهلي وأصحابي وزملائي اللي أدوني سبب أني أكون قوية بحبهم وجدعنتهم، ومش هعرف أكتب أساميكم لأنكم كتير بس حقيقي ادتوني سبب إني أكون قوية بلمتكم حواليا”.

اختتمت: “أنا عارفة أها صفحة وهقلبها وأكون مستعدة لقضاءك يا رب وراضية الحمد لله، أنا بكتب الكلام ده وأنا خلصت خلاص والحمدلله عدت واللي جاي أحسن، أما بقى حكمته فأنا لسه معرفتهاش بس أكيد هعرفها وحياتي هتتغير”.