"غيرت حياته".. تفاصيل مكالمة عادل إمام لـ ماجد الكدواني
ذكر الفنان ماجد الكدواني، تفاصيل المكالمة التي تلقاها من الفنان عادل إمام، ووصفها بأنها غيرت حياته.
قال “الكدواني” خلال حلوله ضيفا على برنامج “سهرانين”، مساء السبت، مع الفنان أمير كرارة، المذاع عبر شاشة “ON”، إنها غيرت حياته وأعطته درسا كبير، مردفا: “رغم أني عمري ما اشتغلت معاه”.
نرشح لك: “وقفة رجالة”.. العب بالشايب تكسب
تابع: “أيام فيلم جاي في السريع، كان في صعوبات في نزوله والفيلم كان جايلي بعد وفاة أمي والفيلم أصلا كان جايلي في المستشفى، وكنت بحارب مع ماما، وكان في 2004، ونزل الفيلم في 2005 لأنه واجه صعوبات إنتاجية مكنتش أعرفها”.
واصل: “فكنت قاعد في البيت لوحدي وباصص للسقف زي ما أكون بكلم ربنا، وكان عندي عقدة بطولة وبكره الكلمة دي ومبحبهاش خالص، فلقيت التليفون بيرن في حالة السرحان دي من رقم غريب وأنا متعود مردش على أرقام غريبة، لكن حاجة جوايا قالتلي رد”.
أردف: “رديت وقالي أنا عادل إمام روحت قاعد على السرير وبحاول أركز في الصوت ليكون حد بيشتغلني، وأنا حافظ كلمة كلمة من اللي قالهالي”، مردفا: “قالي مالكش دعوة بإنتاج ولا مشاكل توزيع ولا قاعات صغيرة ولا كبيرة، مالكش دعوة بحاجة”.
استكمل: “قالي مثل بس وسيب السوق يحطك في المكان اللي يحطك فيه، وقالي اوعى تيأس وتعملي فيها مكتئب وتقعد على السرير وتعمل فيها مكتئب، قولتله هو حضرتك شايفني واتأكدت أنه هو، وقولتله جبت رقمي من أين”، متابعا: “رد قالي مش ضياء عبد الخالق صاحبك، قولتله طبعا دا عشرة عمري، وقالي وأنا في المسرح سألته ماجد الكدواني دا صاحبك طب ما تديني نمرته”.
أضاف: “قالي أنا بحبك وحاسس بيك وعارف اللي بيحصل والمشاعر اللي بتحصل للممثل بعد تعثر الفيلم، بس عايز أقولك مالكش دعوة بحاجة ركز مع نفسك بس ومثل وسيب السوق يحطك في المكان اللي يحطك فيه، وابقى تعالالي المسرح نتكلم، وروحت المسرح أشكره ولقيته قاعد مع كل الممثلين”.
استمر: “قولتله عايز أقولك حاجة ربنا اتكلم على لسانك، فبصلي وسكت معلقش، وقالي تعالى اتفرج على المسرحية قولتله لأ، أنا جاي أشكرك لأن مكالمتك فرقت معايا وفي نفسيتي وفي طاقتي، وكان مهم أجي أشكر حضرتك، والمسرحية هاجي أتفرج مرة تانية”.
يشار إلى أن ماجد الكدواني يُعرض له حاليا، فيلم “وقفة رجالة” ويشاركه البطولة بيومي فؤاد وسيد رجب ومحمد سلام وأمينة خليل وشريف دسوقي، إخراج أحمد الجندي، تأليف هيثم دبور.