مجدي كامل عن أزمات أسرته: العين قوية وجاية في ولادي

علق الفنان مجدي كامل، على الأزمات التي مرت بها أسرته في الفترة الأخيرة منذ أن بدأت أزمة كورونا وحتى الآن.

قال “كامل” في مداخلة هاتفية بحلقة مساء السبت، من برنامج “التاسعة” الذي يقدمه الإعلامي وائل الإبراشي، عبر شاشة التلفزيون المصري، إنه لا يدري ما سبب كل هذه الأزمات، مفسرًا ذلك بأنه ربما يرجع للحسد.

نرشح لك:بعد إثارته للجدل.. تعليق مها أحمد على منشور نجلها

أضاف: “إن الحمد لله مش مقربين من حد، بس معرفش ايه العين القوية دي وجاية في ولادي”.

في نفس السياق، علق على المنشور الذي كتبه نجله مؤخرًا حول الأزمات التي مرت بهم، قائلا: “دايما بنصحه وبقوله أوعى حاجة تهزمك، قولتله خد مني أنا مريت بأزمات وصدمات كتير”.

يشار إلى أن نجل الفنانة مها أحمد، والفنان مجدي كامل، كان قد كتب مؤخرًا، منشورًا عبر حسابه على موقع تبادل الصور والفيديوهات “إنستجرام” جاء نصه كالآتي: “أنا بكتب الكلام ده وأنا إيدي بتترعش وفعلا تعبان ومش قادر ومش عارف أنا عندي إيه ومش عارف اتكلم مع حد علشان مش عايز أخلي حد يشيل همي”.

تابع: “بس أنا هكتب الكلام اللي عايز اكتبه ده علشان أنا مش عارف اللي جاي إيه ولا هيحصل إيه، أنا حياتي بايظه بقالها أربع شهور من يوم 15-6 لحد انهارده 15-10، الأربع شهور دول أوحش أربع شهور عدوا عليا في حياتي من يوم ما جيت الدنيا علشان حصلي فيهم حاجات وجعتني وتعبتني وأثرت علي نفسيتي، أولهم كان أول حب في حياتي عاش لمدة سنة ونص وكان نهايته يوم 15-6”.

أردف: “بعدها كان وفاة حفناوي صاحبي وأخويا يمكن مكناش قريبين من بعض بس مجرد مابنتكلم مع بعض أو بنشوف بعض بيبقي اكننا نعرف بعض من الحضانة وكان في ذكريات حلوة أووي لينا مع بعض، بعدها البيت بتاعنا لما غرق كله ولحد دلوقتي منعرفش غرق ازاي ولا إيه اللي حصل بس الحمد الله على كل شيء ولحد دلوقتي البيت لسه بايظ”.

أضاف: “آخرهم بقى وده لسه من 3 أيام إني تعبت جدا فجأه وتعبت تعب مش عادي ومش عارف أنا عندي إيه ولا الدكاتره عارفين أنا عندي إيه، خدت جميع الأدويه وخدت حقن وبنام كويس وباكل كويس وبعمل كل حاجة وبرضه مفيش أي تحسن، أنا بكتب الكلام ده دلوقتي وأنا مش حابب كده خالص ولا كنت عايز أعمل كده بس عملت كده وكتبت كده وهنزله علشان أنا بجد خايف من اللي جاي ومش عارف إيه اللي ممكن يحصل، فعلشان لو حصل حاجه أكون كتبت كل اللي جوايا وأكون ارتحت إني عملت كده وعلشان برضه تكونوا عارفين أن الضحك والهزار والخروج والاستوريز مش دي الحياة الحقيقية، الحياة الحقيقية هي اللي أنا حكاتها دلوقتي”.

اختتم: “محدش يعرف أنت حياتك عاملة ازاي ولا إيه اللي بيحصل فيها ولا جواك إيه كله شايفك في صور وفيديوهات مش حقيقية، المهم ربنا يستر في اللي جاي ويعدي على خير إن شاء الله علشان المره دي أنا بجد حسيت بالموت، فلو عدت على خير حيات الواحد هيتغير تماما في كل حاجة حتى في الصور والفيديوهات، يا رب أنت الشافي المعافي”.