عمرو وهبة يدافع عن أبطال "رجالة البيت"

دافع الفنان عمرو وهبة، عن أبطال مسلسل “رجالة البيت”، بعد الانتقادات الأخيرة التي تعرضوا لها بسبب العمل، وكان كل من الفنان بيومي فؤاد وأحمد فهمي اعتذرا لجمهورهما بسبب مشاركتهما في عمل لم يرضٍ توقعاتهم.

نرشح لك: بيومي فؤاد معتذرا عن “رجالة البيت”: كنا سخفا ودمنا ثقيل

قال “وهبة” عبر حسابه على “فيس بوك”: “من حق الناس تعترض وتتريق وتسف وأنا بدأت أصلا بفيديوهات تريقه على أعمال وممثلين.. ووالله مش ببرر لحد والحمد لله مش محتاج من حد فيهم حاجة ومحدش طلب مني أدافع وظروف التصوير وضيق الوقت و كورونا مش مبرر كافي إن عمل يطلع وحش بدليل إن في أعمال تانية طلعت كويسة”.

تابع: “بس الأكيد إن مفيش حد بيبقى عايز يفشل ومفيش حد مش بيتعب.. أحمد فهمي عنده أعمال كتير ناجحة وأكرم حسني عنده أعمال كتير ناجحة وأيمن وتار عنده أعمال كتير ناجحة، وأستاذ أحمد الجندي أهم مخرج كوميدي في مصر في آخر كام سنة… فلو عمل متوفقش ده لا ينفي الموهبة بدليل إن بيومي فؤاد اتهاجم في المسلسل ده والناس أشادت بيه في مسلسل خيانة عهد”.

أضاف: “لو في عمل معجبش معظم الناس وأنا طبعا منهم بصراحة ده وارد وبيحصل وحصل لناس ورجعوا تاني، ولو محصلش لناس فأكيد هيحصلهم في يوم.. عدم التوفيق جزء من الشغلانه وخصوصا في حتة الكوميدي اللي هي أصعب حته خصوصا مع شعب دمه خفيف ومش بيضحك بسهوله، والسوشيال ميديا مخليه سقف الضحك يعلى كل يوم.. حق الناس تزعل وحق اللي متوفقش إنه ياخد فرصة تاني طالما ده مش العادي بتاعه”.

“رجالة البيت” بطولة أحمد فهمي، أكرم حسني، بيومي فؤاد، عارفة عبد الرسول، ويزو، لطفي لبيب، تأليف أيمن وتار، إخراج أحمد الجندي.